Trafikimi i mjeteve luksoze, identifikohet një nga autorët
TIRANE - Pas sekuestrimit të 12 makinave luksoze e dy motorëve, Policia e Tiranës ka identifikuar një prej autorëve të dyshuar për trafikim mjetesh motorike. Burime zyrtare të Policisë thanë se oficerët e Antitrafikëve kanë nisur procedim penal në gjendje të lirë për 31-vjeçarin me iniciale A. L. Mësohet se ky person dyshohet për trafikimin e dy motorëve që u bllokuan nga Policia gjatë operacionit të koduar "Summer 2017", konkretisht të dy motorëve të modelit "Aprilia Scarabeo". Ndërsa personat që kanë trafikuar makinat luksoze dhe 3 motorët e tjerë, që u sekuestruan gjatë javës së kaluar, ende nuk janë identifikuar. Policia tha të hënën se ka finalizuar operacionin e koduar "Summer 2017", duke sekuestruar 12 automjete luksoze dhe 5 motorë të dyshuara të trafikuara, duke proceduar penalisht 17 persona. "Në kuadër të prioriteteve të Drejtorisë Vendore të Policisë së Tiranës, për parandalimin, evidentimin dhe goditjen e paligjshmërisë, një tjetër operacion është organizuar dhe zhvilluar për bllokimin e automjeteve motorike të trafikuara në Republikën e Shqipërisë nga vendet e BE- së", tha dje zyrtarisht Policia. Gjatë operacionit janë sekuestruar në cilësinë e provës materiale 12 automjete luksoze dhe 5 motomjete të dyshuara të trafikuara dhe me numër shasie të falsifikuar. Pas ndryshimit të numrit të sha- sisë, këto automjete ishin pajisur me targa të rregullta. Mësohet se makinat e sekuestruara janë të modeleve të fundit të "Mercedez", "Audi", "BMVV", "Range Rover" dhe "Toyota". Gjithashtu, janë bllokuar edhe dy motorë "Yamaha T- Max", një "Suzuki GSXR 750" dhe dy "Aprilia Scarabeo". Burime zyrtare të Policisë thanë se verifikimet u kryen nga oficerët e Seksionit të Trafiqeve të Paligjshme, në bashkëpunim me oficerët e Interpol Tiranës. Mësohet se nga verifikimi me anë të sistemit ASF2 të Interpolit, 17 prej mjeteve rezultuan të parregullta, pasi dyshohet të jenë të vjedhura në vende të ndryshme të Bashkimit Europian.