Sherri në spital, infermieri goditet se nuk i gjente dot damarin
BERAT - Godet infermierin e turnit gjatë një grindjeje, për shkak të mosgjetjes së damarit, por do të përballet tashmë në gjendje të lirë për veprën penale të "Goditjes për shkak të detyrës". Agron V., 46 vjeç, ndodhej ditën e djeshme në spitalin e Beratit për të marrë mjekim, si pasojë e një gjendjeje jo të mirë fizike, shkaktuar nga tensioni i ulët, por sapo është përmirësuar, është marrë në pyetje nga ekspertët hetimorë, pasi qëlloi në fytyrë infermierin e turnit. Ngjarja, për të cilën akuzohet 46vjeçari, nga Ura Vajgurore, ndodhi pasditen e djeshme në Repartin e Urgjencës pranë Spitalit Rajonal të Beratit. 46vjeçari mësohet se kishte kryer vizitën mjekësore dhe ishte në pritje për të marrë injeksionet shoqëruar me serum në një nga dhomat e urgjencës. Por, gjatë kohës që infermieri i turnit, 29- vjeçari me inicialet A. K, ka qenë duke i vendosur vigonin, nuk ka arritur që t'i gjejë damarin dhe për këtë, e ka shpuar disa herë në krah. Duket se kjo situatë është bërë shkak fillimisht për grindjen dhe më pas goditjen e infermierit nga ana e 46-vjeçarit. Burime nga vendi i ngjarjes bëjnë me dije se pacienti është ankuar për paaftësinë e infermierit, gjë, e cila ka mjaftuar për një grindje mes tyre. Infermieri mësohet se i ka kërkuar pacientit të qetësohej, por ky i fundit ka reaguar më keq duke kundërshtuar të vendoste vigonin, gjë e cila e ka vështirësuar situatën. Ndonëse në grindje e sipër kanë ndërhyrë dhe pacientë dhe familjarë të rastit që ndodheshin në dhomë, sherri nuk ka ndalur, madje është përshkallëzuar, pasi 46- vjeçari e ka qëlluar me pëllëmbë në fytyrë infermierin. Ky i fundit më pas është larguar nga dhoma dhe ka kërkuar ndihmën e uniformave blu në lidhje me ngjarjen. Ekspertët hetimorë, që mbërritën në vendin e ng- jarjes, morën denoncimin nga ana e infermierit, pyetën dëshmitarët e rastit dhe dëgjuan pretendimet e 46- vjeçarit. "Më datë 01.09.2017, u referuan materialet në Prokurorinë e Rrethit Gjyqësor Berat, për shtetasin A. V., vjeç 46, banues në fshatin Goriçan, pasi rreth orës 02: 00, në urgjencën e Spitalit Rajonal Berat, ka goditur me grusht infermierin e turnit, shtetasin A. K, vjeç 29", bëhet e ditur nga Policia e Beratit.