PD: Çako e Çipa takuan gjyqtaren, s’e ndihmuan

“Në parlament, ligj i ri që ndalon uljen e dënimeve për vrasje”

Partia Demokratike ka ngritur akuza të forta në drejtim të Drejtorit të Përgjithshëm të Policisë së Shtetit, Haki Çako, dhe Drejtorit të Krimeve në Policinë e Shtetit, Ardian Çipa, në lidhje me vrasjen e gjyqtares Fildes Hafizi. Në një deklaratë për mediat, PD pretendon se gjyqtarja e ekzekutuar në Tiranë nga ish- bashkëshorti i saj është takuar personalisht me dy drejtuesit e lartë të Policisë së Shtetit dhe këta të fundit nuk e kanë ndihmuar. “Vrasja e gjyqtares Fildes Hafizi nuk do të kishte ndodhur nëse krimineli nuk do të favorizohej nga veprimet e papërgjegjshme të shtetit. Nëse krimineli nuk do të ishte liruar nga një amnisti skandaloze, apo nëse Policia do t’i kishte dhënë gjyqtares mbrojtjen që i njeh ligji çdo qytetari, ajo sot do të jetonte. Ne nuk mund ta lëmë të kalojë në heshtje këtë krim, vetëm për të pritur krimin e radhës. Pse policia nuk i afroi mbrojtje gjyqtares Hafizi, kur ajo e kërkoi më shumë se një herë? Pse nuk vepruan për parandalimin e tragjedisë Drejtori i Përgjithshëm i Policisë së Shtetit dhe Drejtori i Kri- meve në Policinë e Shtetit, të cilët u takuan personalisht nga gjyqtarja, ku ajo kërkoi ndihmën e tyre?”, thuhet në reagimin e PD. Selia blu ka ngritur dyshime edhe mbi faktin se, çdo vit qeveria ofron amnisti për lirimin e kriminelëve, ku përfshihen edhe ata që kanë kryer vrasje apo tentative për vrasje. Partia më e madhe opozitare në vend premton, se me nisjen e sesionit të ri parlamentar, do të paraqesë në kuvend një nismë ligjore për ndalimin e uljes së dënimeve për të dënuarit me vrasje. “Pse Edi Rama ka ofruar çdo vit amnisti masive, gjë që nuk ka ndodhur asnjëherë më parë? Pse amnistitë e tij kanë përfshirë ulje dënimi dhe lirim të kriminelëve, që kanë kryer vrasje apo tentuar të kryejnë vrasje? Partia Demokratike do të propozojë në fillim të legjislaturës së re një ligj, i cili ndalon në çdo rrethanë uljen e dënimeve për vrasje dhe amnistimin e tyre. Ne do të propozojmë edhe ash- përsimin e dënimit për ata që ushtrojnë dhunë në familje, si dhe rritjen e mbrojtjes për viktimat e kësaj dhune. Ndërkohë, Partia Demokratike i kërkon Qeverisë të rishikojë me urgjencë procesin e ofrimit të mbrojtjes nga shteti, për të shmangur mundësinë e injorimit të qytetarëve, që u kërcënohet realisht jeta”, thuhet në qëndrimin zyrtar të PD.