Ulje drastike, sa bëhen siguracionet për çdo makinë
Çmimet deri në 6000 lekë më lirë, ja tarifat sipas kategorive
Bëhet fjalë për sigurimin e detyrueshëm, që duhet të paguajë çdo automjet për të qarkulluar. Çmimet, që variojnë sipas vjetërsisë së makinës dhe cilindratës, kanë pësuar luhatje të habitshme gjatë muajit të fundit. Por dje ulja ka qenë drastike.
SA BËHEN ÇMIMET
Tarifat e detyrueshme variojnë sipas ndryshimit të vitit të prodhimit dhe fuqisë së automjetit. Dje, në tregun e sigurimeve, tarifa e TPL ( Sigurimi i Detyrueshëm) për makinat e prodhuara para 10 vitesh, por me një cilindratë të motorit deri në 1600 kubikë, u shit për 11.700 lekë. Vetëm një ditë më parë e njëjta tarifë ishte 17.600 lekë. Pra, ulja është e ndjeshme me rreth 6 mijë lekë. E njëjta ulje, me 6 mijë lekë, u aplikua dje edhe për makinat me cilindratë 1600 kubikë, por më të vjetra se 10 vjet. Çmimi vjetor u ul në 12 mijë lekë, nga 18 mijë lekë që ishte një vit më parë. Ndarja tjetër e çmimit është për makinat me ku- baturë nga 1600 kubikë në 2500 kubikë. Edhe kjo kategori pësoi ulje të ndjeshme, ku çmimi për makinat me vjetërsi nën 10 vjet, u ul në 12 mijë lekë, nga 18.300 lekë që kushtonte një ditë më parë. Ndërsa për makinat me vjetërsi më të madhe se 10 vjet, çmimi u ul nga 18.900 lekë në 12.500 lekë. Të njëjtën tarifë paguajnë edhe makinat me kubaturë më të madhe se 2500 cm3. Nga 19.000 lekë që ishte çmimi i siguracionit vjetor, u bë 12.500 lekë. Ndërsa për automjetet mbi 2500 cm3 dhe me vjetërsi mbi dhjetë vjet, çmimi u bë 13 mijë lekë, nga 19.500 lekë që ishte më parë.
KUSH PËRFITON
Sigurimi i detyrueshëm paguhet një herë në vit. Kjo do të thotë që nga rreth 460 mijë automjete që qarkullojnë në Shqipëri, jo të gjitha e kanë, në këtë periudhë, afatin për rinovimin e siguracionit. Për- fituesit e parë janë ata që kanë këto ditë datën për të rinovuar apo siguruar për herë të parë makinën. Por përfitues mund të jenë edhe ata që e kanë siguracionin në tetor. Pasi ulja është e madhe, dhe me ndryshimet e shpeshta të çmimeve, mund të pritet rikthimi i tarifave si më parë. Duke përfituar nga ulja, mesatarisht 6 mijë lekë për çdo automjet, çdo përdoruesi makine që ka siguracionin edhe në tetor apo nëntor, i leverdis të presë një siguracion të ri.