Beqiraj këmben postin me Korkutin, Rama i heq fondet Akademisë
“Akademia duhet të ketë institutet e saj, do të ketë produkt”
I sapozgjedhur si kryetar i Akademisë së Shkencave, Gudar Beqiraj u shpreh i gatshëm të bashkëpunojë me qeverinë për të reformuar ASH, madje gjatë fjalës së tij përpara procesit të votimit, ai falënderoi Kryeministrin Rama për mbështetjen e vazhdueshme. Pas përfundimit të votimit, ai iu përgjigj interesit të gazetarëve, sidomos për komentet e Kryeministrit Rama. Ndërsa Beqiraj fliste për bashkëpunim, Rama përmes një statusi në rrjetet sociale shkruante se meqë ASH vijoi “farsën”, do t’ia priste fondet dhe do t’ua kalonte universiteteve. Më tej, i pyetur për këtë reagim të Ramës, Beqiraj u shpreh se nuk do të donte të prononcohej për një status në “Facebook”. Ai u shpreh se do të respektonte ligjin në fuqi, pas emërimit të tij nga Presidenti i Republikës. Beqiraj u shpreh se do të donte ta takonte zyrtarisht kryeministrin dhe pastaj do të shprehej për të.
Z. Beqiraj, si kryetar i sapozgjedhur, si i komentoni mesazhet e Kryeministrit Rama për Akademinë e Shkencave?
Për mua është nder dhe përgjegjësi e madhe që më ngarkuan detyrën e kryetarit të Akademisë dhe unë, duke shfrytëzuar eksperiencën që kam në Akademinë e Shkencave, jam tërësisht dakord që ne të jemi bashkëpunues me qeverinë për realizimin e reformës dhe jam i sigurt që kjo reformë do të sjellë ndryshimet e pritura.
Kryeministri është shprehur se nëse nuk reformoheni, do t’jua presë fondet...
Kryeministri vuri një kusht dhe ne jemi shumë të gatshëm për të realizuar reformën. Unë jam dakord, dhe ne deri më sot kemi punuar e bashkëpunuar që të realizohet kjo reformë.
Kush duhet ta realizojë këtë reformë?
Akademia së bashku me qeverinë.
Si mund të reformohet ky institucion?
Mendoj që Akademia duhet të ketë institutet e saj, me të cilët ajo do të ndihet e gjallë, do të ketë produkt. Duke qenë matematikan, jam i parimit që Akademia e Shkencave duhet të jetë frytdhënëse, produktive për të reali- zuar detyra të ndryshme që ka qeveria për ekonominë shqiptare, duke filluar nga ujërat, energjinë, bujqësinë etj.
Sipas mendimit tuaj, edhe Albanologjia duhet të jetë nën çatinë tuaj?
Albanologjia duhet të jetë nën Akademinë e Shkencave, ashtu siç ka qenë edhe më parë.
Përse nuk është kryer kjo reformë më herët?
Nuk duhet të më pyesni mua për këtë.
Si e shpjegoni mungesën e kandidaturave të tjera në garë?
Varet nga zgjedhja dhe dëshira e çdo akademiku. Procesi ka qenë i hapur dhe mund të merrte pjesë kushdo.
Ju personalisht, përse kandiduat sërish?
Ndihem energjik që mund të punoj ende për Akademinë. Kam eksperiencë dhe lidhjet e duhura me akademitë e shkencave në Europë, që besoj se do të më mbështesin për ta çuar më përpara këtë institucion.
Ç’mendim keni për qëndrimin dhe komentet e akademikut Artan Fuga?
Artan Fuga duhet të ishte në mbledhje dhe të votonte. Kjo ishte detyra e një akademiku sot.