Rama: Asnjë qindarkë për Akademinë e Shkencave, zgjodhën farsën
“Nëse nuk reformohet, Akademia e Shkencave nuk do të marrë më asnjë qindarkë nga buxheti e të dorëzojë godinën”
Kryeministri Edi Rama i pret fondet Akademisë së Shkencave të Shqipërisë.
Njoftimin për këtë masë drastike, Rama e bëri publik përmes një statusi në rrjetet sociale pas zgjedhjes së kryetarit dhe nënkryetarit të Akademisë së Shkencave, të cilët në mungesë të kandidatëve të tjerë, thjesht shkëmbyen vendet me njëri- tjetrin, por sigurisht duke iu nënshtruar votimit të Asamblesë. Që herët në mëngjes, kur ende nuk kishte filluar procesi i votimit në Akademinë e Shkencave, Kryeministri kishte “kërcënuar” se, nëse Akademia e Shkencave do të vijonte farsën dhe nuk do të reformohej, jo vetëm që do t’u priste fondet, por do t’u merrte edhe godinën. Një godinë historike, shumë e lakmuar, në qendër të Tiranës.
REAGIMET “Nëse nuk reformohet, Akademia e Shkencave nuk do të marrë më asnjë qindarkë nga buxheti e do të duhet të dorëzojë godinën! Prandaj # StopFarsës”, shkruante Rama. Pas votimit dhe numërimit, që shpalli fitues Beqirajn dhe Korkutin, ashtu si edhe pritej, Rama ka reaguar menjëherë. Ky reagim erdhi në kohë reale, ndërsa kryetari i ri po shprehej për mediat se ishte në një mendje me Kryeministrin për reformimin e Akademisë, që mund të kryhej vetëm nëse këtij institucioni do t’i riktheheshin në varësi institutet e kërkimit shkencor. “Në këtë mënyrë, Akademia do të ndihej e gjallë dhe do të kishte produktivitete”, tha Beqiraj. E ndërsa kryetari shpresonte në bashkëpunimin e Kryeministrit, ky i fundit njoftoi se kaq e patën edhe fondet e Akademisë së Shkencave. Sipas Ramës, ishin vetë akademikët që vendosën për këtë, duke “zgjedhur farsën”. Dhe këto para do t’u kalonin universiteteve. “Meqë ‘ Akademia’ zgjodhi farsën, uroj të gjejnë dhe fondet për vijimin e farsës! Fondet tona do t’i shkojnë universitetit për kërkim shkencor”, është shprehur Rama. I pyetur sërish për këtë reagim të Ramës, Beqiraj u shpreh se nuk do të donte të reagonte për statuse jozyrtare. Pasi emri i tij t’i shkojë Presidentit të Republikës, i cili emëron kryetarin e Akademisë së Shkencave, Beqiraj u shpreh se do të fliste zyrtarisht me Kryeministrin Rama.
BUXHETI Akademia e Shkencave ka një buxhet prej 120 milionë lekësh të rinj. Prej këtij fondi, rreth 30 milionë mbulon botimet e akademikëve dhe konferencat shkencore, ndër- sa pjesa tjetër mbulon shpërblimet e akademikëve dhe detyrime të tjera. Si pagesë për titull, një akademik shpërblehet me 44 mijë lekë të rinj në muaj, një shpërblim që e merr deri në fund të jetës së vet.