Fuga falënderon Ramën: Kryesia e re të japë dorëheqjen
Akademiku Artan Fuga, i cili me reagimin e tij dhe me letrën e hapur, e detyroi në njëfarë mënyre Kryeministrin Edi Rama të reagojë, ka falënderuar këtë të fundit. Sipas tij, reagimi i Ramës ishte i drejtë. “Falënderoj, jashtë çdo konteksti politik, si anëtar i Akademisë së Shkencave, Kryeministrin Edi Rama për pozicionin e drejtë të mbajtur sot në mëngjes, in extremis, dy orë përpara farsës së lemerishme në Akademinë e Shkencave ku po kërkohet t’i vihet kapak gjoja demokratik me zgjedhje farsë degradimit të saj”, është shprehur Fuga përpara procesit zgjedhor, me shpresë se pas reagimit të kryeministrit, do të ndodhte diçka “ndryshe” në ASH. “Unë, sikurse e kam shprehur modestisht, besoj fort se Akademia e Shkencave e Republikës së Shqipërisë mund të reformohet, të bëhet një institucion splendid që të rrezatojë në diturinë dhe shkencën e shqiptarëve, e pavarur, e lirë, por efikase dhe në partneritet me të gjitha agjencitë që janë për një Shqipëri të emancipuar. Jo, ne nuk i duam ato paré nga buxheti për xhepat tanë. Ose të reformohemi, ose ta kyçim derën me turp! Ndal zgjedhjeve farsë, ky është hapi i parë që duhet bërë sot, jo nesër”, shkruante Fuga. Por shpresa e tij mori fund shumë shpejt, vetëm pas një procesi më pak se 2 orësh votimi dhe numërimi votash, që shpalli kryetar Gudar Beqirajn dhe nënkryetar Myzafer Korkutin. “Akademikë, shpëtojeni urgjent Akademinë nga kalbëzimi!”, bën thirrje Fuga, i cili nuk mori pjesë në zgjedhjet e zhvilluara në ASH. “Shoqëria nuk mund të alokojë fonde për një shërbim që nuk e merr! Regjimi i privilegjeve ka mbaruar që më 4 gusht 1789! Pasi u zgjodh në një kontekst krejt jo dinjitoz, me akademikë që refuzuan të kandidojnë brenda atij kuadri, i uroj kryesisë të ri- rizgjedhur të japë dorëheqjen dhe të mos e tërheqë edhe institucionin në humnerën e kokëfortësisë! Këto zgjedhje nëse nuk shpallen ‘ non-lieu’, sot apo nesër, janë kambana e fundit për Akademinë e Shkencave! Asgjë nuk e ndaloi që sot më 4 shtator 2017 në Akademinë e Shkencave të ndaloheshin zgjedhjet që nuk janë zgjidhje!
Zgjedhje thjesht rrotative, ku kryesia rizgjidhet si e njëjta kryesi, si një rikthim i përjetshëm rrotavi rreth së njëjtës gjë, ndërkohë kur i gjithë opinioni i vendit e tregon me gisht Akademinë si një institucion që ka degraduar!
Zgjedhjet sot e kundërvunë Akademinë e Shkencave me arrogancë kundër opinionit publik të vendit!”, u shpreh Fuga përmes një statusi në rrjetet sociale. Sipas tij, kryesia e rizgjedhur nuk do të mbysë zërin e lirë, por ai thotë se do të vijojë në rrugën e nisur.