Kryemadhi: Axhendë të qartë për mbrojtjen e demokracisë
Kryetarja e Lëvizja Socialiste për Integrim tha dje se ka një axhendë të qartë për mbrojtjen e demokracisë. Në mbledhjen e Kryesisë së kësaj partie, Kryemadhi tha se nevojitet një LSI e qartë dhe e vendosur që të ndjekë një axhendë të pakompromistë, që do të synojë mbrojtjen e të drejtave të njeriut dhe mbrojtjen e demokracisë. “LSI është më e fortë se asnjëherë, pasi kaloi me sukses një sprovë të 25 qershorit, ku u targetua në mënyrë kriminale për t’i dhënë një pushtet të plotë oligarkisë deri në kapjen e çdo qelize të institucioneve të shtetit. U sulmua pabesisht, por tregoi qëndrueshmëri, rritje dhe vitalitet. Sot kemi një grup parlamentar jo vetëm më të madh në numër, por shumë më cilësor edhe me të rinj me të gjitha potencialet për të qenë një opozitë përfaqësuese profesionale dhe luftarake me integritet, përballë një pseudomaxhorance, që është pakica e shqiptarëve dhe jo shumica. LSI ka përgjegjësi shumë më të madhe se sa mund të mendojë dikush, se jemi përfaqësues të shumicës së shqiptarëve”, tha Kryemadhi. Sipas saj, ky proces do të shoqërohet me hapjen ndaj cilido që kërkon të përfshihet e të kontribuojë në këtë aksion që synon zgjimin dhe bashkimin e shumicës së shqiptarëve për të vendosur sovranitetin e tyre mbi qeverisjen dhe institucionet. Do ta fillojmë riorganizimin me analizat e rezultateve për çdo qark e njësi vendore për të forcuar punën e strukturave për të ardhmen”. Në përfundim të mbledhjes, nënkryetari i LSIsë, Luan Rama, bëri të ditur dhe emrat e dy nënkryetarëve të Grupit Parlamentar të LSI- së, të cilët do të jenë Klajda Gjosha dhe Përparim Spahiu.