FATION BINJAKU
PROTESTA ME BOJË TË KUQE KUNDËR MD
Përfaqësuesit e shoqërisë civile kanë protestuar dje para Ministrisë së Drejtësisë, duke bërë përgjegjës këtë institucion për lirimin me amnisti të Fadil Kasemit, i cili disa ditë më parë vrau ish- bashkëshorten, Fildes Hafizin. Aktivistët e shoqërisë civile qëlluan me boje të kuqe Ministrinë e Drejtësisë në shenjë proteste. Por, në një reagim zyrtar, ministri në detyrë, Gazment Bardhi, thekson se nuk është institucioni që ai drejton përgjegjës për dhunën në familje dhe rastin e vrasjes së gjyqtares Hafizi. “Lëvizja e sotme e shoqërisë civile, ku gabimisht iu kërkua llogari Ministrisë së Drejtësisë për përgjegjësi që nuk i ka, apo kompetenca që nuk i disponon, nëpërmjet simbolikës së ngjyrosjes me bojë të kuqe të godinës së Ministrisë së Drejtësisëý, nxjerr në pah nevojën e menjëhershme për të sqaruar mekanizmat dhe autoritetet përgjegjëse.”, thuhet në reagimin e MD- së.
Kreu i shtetit, Ilir Meta, prezantoi dje katër nismat që ka ndërmarrë si President i Republikës për të parandaluar ngjarjet kriminale brenda familjes.
Presidenti i Republikës e ka quajtur krim mizor vrasjen e gjyqtares Fildes Hafizi nga ish- bashkëshorti dhe për këtë arsye, ai është zotuar se nuk do të ndërmarrë në të ardhmen asnjë nismë faljeje për personat që kanë ushtruar dhunë apo kanë kryer krime brenda familjes. Meta në reagimin e Presidencës ka thënë se ai do të tregohet i kujdesshëm gjatë ushtrimit të mandatit të tij, për të mos ndërmarrë asnjë nismë faljeje për veprat penale “Vrasje për shkak të marrëdhënieve familjare” apo “dhuna në familje”. “Ditët e fundit opinioni publik u trondit nga një krim mizor i kryer ndaj gjyqtares Fildes Hafizi. Fenomeni i dhunës në familje është një plagë e madhe dhe tepër e ndjeshme në shoqërinë shqiptare. Angazhohem që si President në ushtrimin e kompetencës kushtetuese të ushtrimit të së drejtës së faljes, do të zbatoj në germë dhe në frymë Kushtetutën e RSH, si dhe ligjin 10 295/ 2010 ‘ Për faljen’, por jo vetëm. Një familje e lumtur, në mirëqenie dhe paqe brenda saj, ka vlera të jashtëzakonshme për zhvillimin e shoqërisë. Duke pasur në konsideratë sa të rëndësishme janë jeta dhe shëndeti për çdo anëtar të familjes, por edhe rrezikshmërinë që paraqesin individët dhunues në familje, me qëllim dekurajimin dhe parandalimin e tyre në kryerjen e këtyre veprave, angazhohem që gjatë mandatit tim presidencial nuk do të ushtroj të drejtën e faljes për asnjë individ të dënuar për vepra penale në marrëdhëniet familjare ( përfshirë këtu, por jo vetëm, nenet 79/ c, 130/ a, të Kodit Penal)”, thuhet në qëndrimin e kreut të shtetit.
NDRYSHIMET Meta ka lënë të hapur dhe mundësinë e amendamenteve ligjore, duke u bërë thirrje dhe Qeverisë apo Parlamentit që të ndërmarrin edhe ndryshime të legjislacionit për të mos lejuar faljen e personave të dënuar për dhunë brenda familjes. Ai gjithashtu i ka bërë thirrje Ministrisë së Drejtësisë që të mos përfshijë në nismat e amnistisë rastet e krimeve brenda familjes. “Nëse për zbatimin e angazhimit të mësipërm në ushtrimin e të drejtës së faljes nevojiten ndryshime në ligjin ‘ Për faljen’, kërkoj angazhimin dhe bashkëpunimin e institucioneve të tjera për ndërmarrjen e nismës ligjore për këtë qëllim. Gjithashtu i bëj thirrje Ministrisë së Drejtësisë si nismëtare për projektligjet për dhënie amnistie, por edhe ligjvënësve të Kuvendit të Shqipërisë, që në vijim në asnjë rast në këto projektligje të mos përfshihen si subjekte përfituese të tyre të dënuarit të cilët kanë kryer vepra penale në marrëdhëniet familjare”, ka thënë ai. Lidhur me rastin e vrasjes së gjyqtares Fildes Hafizi nga ish- bashkëshorti, Meta ka shfrytëzuar tagrin e tij kushtetues të kreut të KLD- së për të urdhëruar një hetim të vendimeve të Gjykatës së Kavajës që çuan në lirimin e Fadil Kasemit. Po ashtu Meta ka urdhëruar që KLD- ja të shqyrtojë në rendin e saj të ditës të gjitha rastet e vendimeve të gjykatave dhe zbatimin e tyre kur viktimat e dhunës kërkojnë urdhër mbrojtjeje.