Prindërit e "Fan Nolit": Mos na i transferoni fëmijët
"Vendime të tilla arbitrare dëmtojnë nxënësit, s'do t'i lejojmë"
Zgjidhja e problemit të mësimit me dy turne në Tiranë po hap të tjera probleme.
Nxënës të lagjeve afër, që për vite kanë mësuar në të njëjtën shkollë, do të duhet të transferohen në ato të sapondërtuarat nga bashkia. Kështu po ndodh me fëmijët që frekuentojnë shkollën "Fan Noli". Drejtoria Arsimore, në bashkëpunim me bashkinë, po shqyrton mundësinë e kalimit të klasave të pasdites, duke krijuar vështirësi për ecurinë e mëtejme në mësime apo transportin e nxënësve. Prindërit e tyre i kanë drejtuar një letër ankesë Ministrisë së Arsimit, Drejtorisë Arsimore dhe Bashkisë, duke i parashtruar një sërë argumentesh kundër transferimit të fëmijëve në një tjetër shkollë, për të cilën ende nuk janë vënë në dijeni zyrtarisht. "Ne si prindër dhe qytetarë taksapagues nuk do të lejojmë dhe do të përdorim të gjitha mjetet ligjore për të siguruar që fëmijët tanë të mos lëndohen, të mos dëmtohen nga vendime të tilla arbitrare, që nuk e konsiderojnë fëmijën si identitet, si qenie humane, por si send dhe objekt pa dinjitet", citohet në letër- ankesën drejtuar institucioneve. Ky fillimvit vjen me tri shkolla të reja, për të cilat është thënë se do të ulin ngarkesën në klasa, pa menduar interesin më të lartë të fëmijëve.
ANKESA
Vetëm pak ditë përpara se të nisë viti i ri shkollor, prindërit e nxënësve që frekuentojnë shkollën "Fan Noli" janë njohur me diskutimet që po bëhen në zyrat e institucioneve. Nisur nga kjo, ata kërkojnë që gjatë bisedimeve të ketë një përfaqësi prindërish që të marrë në konsideratë kërkesat e tyre. "Ka shumë familje, të cilat kanë të paktën 2 fëmijë të regjistruar në këtë shkollë. Ndarja e fëmijëve të së njëjtës familje në dy shkolla të ndryshme, relativ- isht në distancë të konsiderueshme, vështirëson ndjeshëm transportin e fëmijëve. Për shumë familje, kjo shkollë është zgjedhur duke qenë më e afërta me banesat e tyre. Largimi i fëmijëve në shkollën e propozuar, për më tepër në një zonë që mungojnë mjetet publike të transportit, e vështirëson transportin", citohet në ankesë. Veç transportit, ajo që i shqetëson më tepër është ecuria e mëtejme mësimore. Edhe në këtë rast, mësimi me dy turne është alternativa më e mirë për ta. "Zhvillimi i mësimit me 2 turne është i vështirë si për fëmijën, ashtu edhe për prindërit. Por prindërit e kanë gjetur tashmë balancën për të bërë të mundur ecurinë sa më të mirë të fëmijëve të tyre. Transferimi i një prej fëmijëve në një shkollë tjetër, vetëm pak ditë para fillimit të shkollës prish ekuilibrat e vendosur për sa i përket edukimit të fëmijëve", nënvizojnë prindërit.