Merkel fiton debatin me Schulz, Turqia kritikon dy kandidatët

Të dielën në mbrëmje, në Gjermani u mbajt debati televiziv mes dy rivalëve kryesorë për kancelarinë në zgjedhjet e 24 shtatorit, kancelares aktuale Angela Merkel dhe socialdemokratit Martin Schulz. Sipas sondazheve, debatin e fitoi Merkel. Por nëse njerëzit prisnin përplasje të fortë në politikat mes tyre, nuk kanë marrë atë që kanë dëshiruar. Në fakt, Gjermania mund të jetë lider në botën perëndimore për mënyrën se si i trajton këto debate, të cilat, sipas ekspertëve të politikës, duken më shumë si negociata koalicioni sesa duele. Të dy politikanët e debatit të së dielës janë centristë dhe me shumë popullaritet. Gjatë shpërfaqjes së qëndrimeve të tyre mbi çështje të ndryshme, ata i kanë buzëqeshur njëri- tjetrit, kanë tundur kokën në shenjë pohimi kur tjetri fliste dhe kanë bërë shaka. As katër moderatorët nuk mundën të krijonin përplasje mes tyre. Një prej pikave në të cilën ishin dakord, ishte edhe qëndrimi se Turqia nuk duhet të jetë anëtare e Bashkimit Europian. Zyrtarët turq i kanë denoncuar Merkel dhe Schulz për retorika antiturke. Schulz tha në debatin e së dielës se do të ndërpriste bisedimet për anëtarësimin e Turqisë në BE, për shkak të sundimit autoritar të Presidentit Erdogan. Ndërsa Merkel, e cila më parë kushte shprehur dyshime, refuzoi të japë një qëndrim të prerë, por tha se do të qëndrojë në anën e vendeve të tjera të BE- së. "Turqia po ndahet nga të gjitha praktikat demokratike me shpejtësi të madhe", tha ajo. Omer Celik, kryenegociatori i Turqisë për anëtarësimin në BE, ka fajësuar kandidatët për tonin e tyre të pakujdesshëm. "Ne nuk e pranojmë këtë mesazh të parespektueshëm kundër Turqisë", ka reaguar ai. Edhe Ministria e Jashtme turke kritikoi politikanët për "këndvështrimet miope" dhe ka kujtuar rolin e Turqisë në bllokimin e krizës së emigracionit që po e shtynte BE- në në kaos të madh.