Struktura e re, si do shkrihen agjencitë nga Ministria e Arsimit

Denoncimi i Luan Ramës: Projekt i Qeverisë së Tepsisë, është parashikuar përpara zgjedhjeve zhdukja e Akademisë së Shkencave

Qeveria ka gati skemën e re të institucioneve dhe agjencive që do të ristrukturohen.

Pas raportit të grupit të punës që u bë pjesërisht publik në Asamblenë Kombëtare të PS- së nga Niko Peleshi, të gjitha ministritë kanë bërë gati shkrirjen e institucioneve të varësisë. Do të jenë rreth 40 institucione, agjenci dhe inspektorate që do të pushojnë së ekzistuari, ndërsa funksionet e tyre do të përqendrohen në agjencitë e reja që do të krijohen. Nënkryetari i Lëvizjes Socialiste për Integrim, Luan Rama, bëri publike dje një tabelë të agjencive të reja që krijohen në Ministrinë e Arsimit nga shkrirja e disa prej instituteve dhe agjencive aktuale. Tabela duket se është projekti që Ministria e Arsimit do t’i paraqesë mbledhjes së qeverisë ku në Qendrën Kombëtare të Kërkimit Shkencor do të përfshihen Akademia e Shkencave, Qendra e Studimeve Albanologjike dhe shumë institute për kërkim- zhvillim. Gjithashtu, Agjencia për Zhvillimin dhe Financimin e Shkencës dhe Inovacionit do të ketë në përbërje të saj edhe Agjencinë Kombëtare të Certifikimit Elektronik, Agjencinë e Kërkimit dhe Inovacionit dhe Agjencinë Kombëtare të Shoqërisë dhe Informacionit. Tek Entet Rregullatore të kësaj ministrie, Autoriteti Shqiptar për Cilësinë e Arsimit Parauniversitar do të shndërrohet në Inspektoratin e Arsimit.

DENONCIMI Nënkryetari i LSI- së, Luan Rama, në një status të tij në Facebook, shprehet se qeveria kishte parashikuar shkrirjen e shumë agjencive dhe institucioneve, përfshirë edhe Akademinë e Shkencave para zgjedhjeve të 25 qershorit. “Në dokumentin e mëposhtëm, projekti i Qeverisë së Tepsisë; është parashikuar përpara zgjedhjeve të 25 qershorit zhdukja e Akademisë së Shkencave! Siç vërehet, nën Ministrinë e Arsimit, Kulturës, Inovacionit, Rinisë dhe Sporteve është parashikuar edhe Qendra Kombëtare e Kërkimit Shkencor, në të cilën do të përfshihen Akademia e Shkencave + Qendra e Studimeve Albanologjike + shumë institute për kërkim shkencor!”, shkruan Luan Rama. Ministri i Bujqësisë, Niko Peleshi, tha dy ditë më parë se do të shkrihen të gjitha agjencitë apo institucionet me 10 punonjës, ndërsa punonjësit nuk do të largohen nga puna. “Unë kam 4 vite në qeveri dhe nuk e dija që ekziston Agjencia për Shërbime Shëndetësore për Personalitetet, një rudiment i së kaluarës. As kolegët e mi nuk e dinin dhe nuk kanë marrë ndonjëherë shërbim dhe nuk është e nevojshme në këtë kohë. Ne propozojmë shkrirjen e saj dhe përqendrimin e shërbimeve te Drejtoria e Shërbimeve Qeveritare. Të gjitha institucionet që kanë nën 10 punonjës do të shkrihen, punonjësit nuk do të largohen, nuk do të dalin të papunë, por do të bashkohen me një institucion tjetër me funksione të ngjashme apo të afërta”, tha Peleshi. Sipas tij, cilësia e administratës do të shkundet, njerëzit ankohen për shërbimet, nuk u intereson kostumi politik i punonjësit. “Dëgjesat filluan pas zgjedhjeve dhe do të institucionalizohen. Elementi koalicion e ka përkeqësuar situatën sa i takon cilësisë së shërbimeve. Kur janë institucione që u përkasin partive të ndryshme, pra kanë drejtorë që janë prodhuar politikisht nga aleatët, por dhe brenda nesh kemi pasur probleme”, tha Peleshi.