Basha në Asamblenë e PPE: Reformim i sistemit zgjedhor
“T’i japim fund historisë së manipulimit të zgjedhjeve”
Kryetari i opozitës, Lulzim Basha, shqetësimin e tij për manipulimin e zgjedhjeve të 25 qershorit në Shqipëri, e ka ndarë me krerët e Partive të djathta europiane.
Basha po merr pjesë në punimet e asamblesë së PPEsë, që po zhvillohet në Kopenhagën, dhe gjatë fjalës së mbajtur në këtë asamble, ka ndarë edhe gjithë problematikat që shoqëruan zgjedhjet parlamentare në Shqipëri. Kreu i Partisë Demokratike ka deklaruar se, në vendin tonë është domosdoshmëri për demokracinë, por edhe për vetë opozitën reformimi i sistemit zgjedhor. Sipas Bashës, është pikërisht sistemi aktual zgjedhor që lejon edhe mundësinë e tjetërsimit të vullnetit të zgjedhësve. “Është e rëndësishme për opozitën dhe vetë demokracinë në Shqipëri, reformimi i sistemit zgjedhor, për t’i dhënë fund përgjithmonë historisë së manipulimit të zgjedhjeve”, deklaroi kreu i PD-së, Basha, gjatë fjalës së mbajtur në asamblenë e PPE-së. Gjithashtu, kreu i opozitës, para krerëve të partive të djathta europiane prezantoi edhe vizionin e tij për të ardhmen e PD- së dhe të opozitës në vendin tonë. Sipas burimeve nga Partia Demokratike, Basha, gjatë kësaj asambleje ka diskutuar edhe mbi përballjen me sfidat për integrimin europian të vendit, ku edhe ka marrë mbështetjen e partnerëve europianë në këtë proces. Kreu i PD-së mori gjithashtu premtimin për vazhdimin e mbështetjes direkte politike të PPE- së dhe partive simotra për Partinë Demokratike, përfshirë mbështetjen me këshillim dhe asistencë, në lidhje me strategjinë dhe alternativën opozitare.
SEANCA Kreu i Partisë Demokratike pritet të mbledhë pas kthimit nga asambleja e PPEsë, grupin e tij parlamentar për të përcaktuar strategjinë e opozitës në nisje të sesionit të ri parlamentar. Presidenti Ilir Meta ka dekretuar 9 shtatorin si ditën në të cilën do të nisë edhe sesioni i ri par- lamentar dhe deputetët e PDsë ende janë të paqartë për mënyrën se si do të organizohet jeta parlamentare. Gjatë mbledhjes së grupit par- lamentar, Basha pritet të paraqesë edhe emrat e tre drejtuesve të komisioneve që do të drejtojnë PD në parlament dhe gjithashtu, emrat e nënkryetarëve të komisioneve të tjera. Me interes pritet edhe vendimi që Basha do të marrë për mënyrën se si demokratët do të kundërshtojnë propozimin e Ramës, për të qenë Gramoz Ruçi në krye të Kuvendit të Shqipërisë dhe Fatmir Xhafaj në krye të Ministrisë së Brendshme.