Transporti dhe infrastruktura, Bashkia Tiranë bashkëpunon me atë të Vjenës
Ekspertët më të mirë të planifikimit urban të Bashkisë së Vjenës do të asistojnë administratën e Tiranës, në drejtim të zhvillimit urban dhe menaxhimit të qytetit. Ekipi i drejtuar nga drejtoresha e përgjithshme e Planifikimit Urban, Zhvillimit dhe Ndërtimit të qytetit të Vjenës, Brigitte Jilka, u takua dje me kryebashkiakun e Tiranës, Erion Veliaj, i cili vlerësoi tepër të rëndësishëm bashkëpunimin mes dy bashkive, veçanërisht të ideve inovatore për menaxhimin e qyteteve. "Unë besoj se, detyra jonë, pavarësisht se jemi qyteti më i mirë në Shqipëri, është që të bëhemi akoma më të mirë. Por, për t'u bërë më të mirë, duhet të mësojmë nga më të mirët. Prej vitesh, Vjena renditet si një nga qytetet më të jetueshëm në botë. Ndaj, be- soj se duke bashkëpunuar me menaxherët e qytetit të Vjenës në të gjitha fushat, duke filluar nga transporti publik, te përpunimi i mbetjeve, infrastruktura, kultura, urbanistika, mund të mësojmë nga më të mirët, të sigurohemi që jo vetëm nuk bëjmë gabimet që të tjerët mund t'i kenë bërë përpara nesh, por të shijojmë idetë më inovatore për menaxhimin e Tiranës". Kryebashkiaku nuk fshehu entuziazmin që për herë të parë, pas takimit midis dy kryetarëve, tashmë, skuadra e menaxherëve të qytetit të Tiranës dhe të Vjenës po bashkëpunojnë edhe në nivel teknik për çështje të ndryshme. "Marrëdhënia jonë me Vjenën është një marrëdhënie reale, ku njerëzit që kemi në krye të punëve më të rëndësishme, të qyteteve respektive, në një farë mënyre po bashkëpunojnë për t'i bërë qytetet tona akoma edhe më të mira", nënvizoi Veliaj. Ndërsa, drejtoresha e përgjithshme e Planifikimit Urban në Vjenë u shpreh se qeverisja e mirë është çelësi për një jetë më të mirë për qytetarët. "Ne ia kemi dalë me sukses të rrënjosim mentalitetin në qendër të Europës dhe unë besoj se kjo është një arsye e mirë që ta fillojmë këtë bashkëpunim. Qeverisja e mirë është çelësi për një jetë më të mirë dhe qeverisja e mirë përfshin mendjen e hapur, përfshin shkëmbimin e ideve dhe eksperiencave, e gjithashtu, përfshirjen e shoqërisë civile. Unë mendoj se kjo është ajo çka nisëm në Vjenë dhe gjithashtu, këtu në Tiranë", tha Brigitte Jilka. Delegacioni i Bashkisë së Vjenës me atë të Tiranës shkëmbyen ide për zhvillimin dhe modernizimin e mëtejshëm të dy qyteteve.