Zbulohet laboratori i heroinës, arrestohet ‘ Maradona’ shqiptar
GREQI - Përfundon në pranga kreu i një grupi për trafikimin e drogës në Greqi, sekuestrohet një sasi e madhe prej 23 kg heroinë. Një organizatë kriminale, që trafikonte drogë në shumë vende të Greqisë dhe që kishte zhvilluar sistemin paralel të magazinimit të heroinës, u shkatërrua nga Policia e Atikës në Greqi. Për rrjedhojë është sekuestruar 23 kg heroinë dhe pesë shqiptarë kanë rënë në prangat e Policisë greke pas zbulimit të laboratorit të drogës. Operacioni policor u zhvillua në Aspropirgo të Athinës, ku brenda në laborator janë sekuestruar 23 kg heroinë e shpërndarë në 49 pako me nga gjysmë kilogrami, 38.8 gramë kanabis nëpër disa paketa najloni, gati për shitje; 16.5 kg përzierës, 1 karabinë, 525 euro dhe materiale të tjera, si edhe një kamion. Në sasitë e heroinës së kapur, në pako janë gjetur edhe mbishkrime, që korrespondonin me qytetet e destinacioneve, si Selanik, Patra dhe Larisa, ku droga pasi përpunohej, tregtohej më pas në këto vende. Ndërsa nuk përjashtohet mundësia që një pjesë e heroinës të ishte e destinuar edhe për tregun e Europës Perëndimore. Sipas Policisë greke, udhëheqës i organizatës kriminale, që vepronte në Aspropirgos, është një shqiptar 27- vjeçar me pseudonimin "Maradona", i cili u arrestua gjatë operacionit, së bashku edhe me katër anëtarët e tjerë të organizatës. Mes të arrestuarve nga policie greke ishin një shqiptar 45 vjeç, një tjetër 39- vjeçar, si dhe dy grekë, 19 dhe 41 vjeç, pa bërë të ditur identitetin e plotë të tyre. Sipas Policisë greke, bëhet me dije heroina e sekuestruar në treg do të kapte një vlerë monetare prej rreth 350 000 eurosh. Laboratori funksiononte në një kamp romësh, në pjesën perëndimore të Athinës. Sipas Policisë, heroina e përpunuar në atë laborator trafikohej në zona të ndryshme të Greqisë dhe kryesisht në Selanik, Patra dhe Larisa. Në laborator u gjetën qese plastike bosh, por që kishin etiketa ku shkruheshin emrat e këtyre qyteteve.