"Oxford" e "Cambridge", lider të arsimit të lartë në botë
Universiteti "Oksford" është në krye të renditjes botërore të universiteteve të botës, me "Cambridge" në vendin e dytë, pasi ngjiti dy pozicione nga viti i kaluar, kur ndodhej në vendin e katërt. Një faktor kyç në renditje janë të ardhurat, dhe të dyja universitetet patën rritje në këtë pjesë vitin e kaluar, pjesërisht në formën e granteve mbi kërkimet të Bashkimit Europian. "Times High Education", që përpilon renditjen, njoftoi se diferencat ishin jashtëzakonisht të ngushta në kryesim, me të gjitha institucionet që shkëlqejnë në masat në mësimdhënie, hulumtime, citime, pikëpamje ndërkombëtare dhe të ardhura. Por "Oxford" dhe "Cambridge" patën rritje të ndjeshme në të ardhurat totale të tyre institucionale, përkatësisht 24% dhe 11%, ndërkohë që rivalët e tyre më të afërt, "California Institute of Technology" dhe "Stanford University" kanë parë renie të të ardhurave. Studiuesit gjithashtu kanë theksuar se rreth një e katërta e të ardhurave kërkimore të "Cambridge" dhe një e pesta e të ardhurave të "Oxford" vijnë në formën e granteve të BEsë, një faktor që rrezikohet nga Brexit, dalja e Britanisë nga BE, gjë që mund të paraqiste ndikim dhe ndryshime të mëdha në performancën globale të universiteteve kryesore në Mbretërinë e Bashkuar. Në krye të renditjes globale të 1000 universiteteve në 77 shtete, mbizotërojnë institucionet amerikane. Universitetet e tjera në Mbretërinë e Bashkuar në renditjen e 50 universiteteve të para janë "Imperial College London" në vendin e tetë; "University College London", vendi i 16- të; Shkolla e Ekonomisë dhe Shkencave Politike në Londër, në vendin e 25- të; Universiteti i Edinburgut, në vendin e 27- të; dhe "King's College" në Londër, në vendin e 36- të. Studiuesit thonë se gjetjet tregojnë se ka një difer- encë të madhe mes "institucioneve superelitare të Mbretërisë së Bashkuar dhe universiteteve të tjera", me vetëm mbi gjysmën e 200 institucioneve kryesore të Mbretërisë së Bashkuar, që kanë rënë në renditje, sipas BBC.