PER RILLOGARITJEN Pensionet e ushtarakëve, Kushtetuesja pranon dosjen
Avokati i shoqatave të ish- ushtarakëve dorëzon dosjen në Gjykatën Kushtetuese. Hapat që do ndiqen deri në vendimin përfundimtar
Gjykata Kushtetuese do të marrë sot në shqyrtim dosjen që vendos fatin e mijëra ish- ushtarakëve.
Tri janë opsionet e mundshme të verdiktit të saj: gjykata mund të pranojë kërkesën për gjykim, mund të kërkojë më parë një seancë dëgjimore me palët e interesuara, ose të mos e pranojë kërkesën e tyre. Në rast se kjo e fundit ndodh, shoqatat e ish- ushtarakëve thonë se janë të gatshme ta dërgojnë çështjen në Gjykatën e Strasburgut. Kërkesa për të kaluar në seancë gjyqësore çështjen e ish- ushtarakëve është pranuar që më 17 korrik, ndërsa sot zhvillohet gjyqi, në të cilin do të jetë e pranishme vetëm trupa e Gjykatës Kushtetuese, pa praninë e avokatëve.
KËRKESAT
Shfuqizimi i vendimit të marrë në fund të muajit prill nga Kolegjet e Bashkuara të Gjykatës së Lartë, është kërkesa kryesore e ish- ushtarakëve në padinë e dorëzuar në Kushtetuese. Avokati i shoqatave të ushtarakëve, Bashkim Asllanaj, sqaron vendimin që cenon të drejtat dhe interesat e ish- ushtarakëve. "Së pari, me vendimin unifikues urdhërohet të përllogaritet masa e pensionit, e cila duhet të mos jetë më e madhe se pensioni maksimal i pleqërisë në shkallë republike. Kjo, në një kohë që ai ligj që urdhëronte kështu, i vitit 1996, është shpallur antikushtetues dhe është shfuqizuar. Së dyti, ka urdhëruar që mbi bazën e këtij vendimi unifikues të rillogariten të gjitha pensionet e ushtarakëve për vjetërsi shërbimi, duke përdorur kritere joligjore, të cilat janë shfuqizuar nga ligji. Edhe kjo gjë i dëmton shumë ushtarakët. Po kështu, ka urdhëruar që përllogaritja e pensionit të bëhet mbi pagën neto dhe jo mbi pagën bruto. Po ashtu ka ur- dhëruar edhe për pensionet suplementare". Këto janë vetëm disa nga manovrat e përmendura në vendim, që ulin ndjeshëm masën e përllogaritjes së pensioneve të ushtarakëve. Nisur nga kjo, avokati i shoqatave që përfaqëson kërkon që Kushtetuesja ta shpallë vendimin unifikues të Gjykatës së Lartë antikushtetues. "Unë mendoj se Gjykata Kushtetuese duhet ta goditë vendimin unifikues, pasi është një vendim skandaloz i Gjykatës së Lartë. Nuk ka asnjë bazë ligjore. Në këtë formë ka hedhur poshtë të gjitha ligjet e Parlamentit për ushtar- akët", nënvizon Asllanaj.
SKEMA E RE
Skema për përllogaritjen e pensioneve përcakton që ushtarakët, të cilët kanë mbushur moshën 65 vjeç, duhet të kenë 36 vite kontribute për të përfituar pension të plotë. Pas reformës së pensioneve në 2015, mosha e daljes në pension për burrat deri në vitin 2032 do të jetë 65 vjeç, ndërsa vitet kontributive rriten nga viti në vit, me 4 muaj.
Ndërsa pension të parakohshëm përfitojnë ushtarakët 47 vjeç, që kanë 15 vite punë, u është shkurtuar vendi i punës ose dalin në rezervë. Kategoritë e lartpërmendura marrin fillimisht dy rroga shpërblim dhe për 22 muaj përfitojnë gjysmën e rrogës dhe vetëm pas kësaj periudhe, u lidhet pension i parakohshëm për vjetërsi shërbimi. Por si përllogaritet kjo masë? Skema e pensioneve parashikon 50% të pagës referuese mbi të cilën është derdhur kontributi dhe për çdo vit tjetër të vjetërsisë së shërbimit ( mbi 12 për gratë dhe 15 për burrat), masa e pensionit shtohet me 2% të pagës referuese. Sakaq, kur plotësohet mosha e daljes në pension, ushtarakët përfitojnë masën e merituar dhe pensionin suplementar për vitet e shërbimit në ushtri.