Presioni pas zgjedhjeve në Akademi, jep dorëheqjen nënkryetari
Arkeologu e motivoi aktin e tij të parevokueshëm me arsye personale. Pritet rihapja e fushatës për postin
Muzafer Korkuti i ka dhënë fund rokadës së posteve në krye të Akademisë së Shkencave. Pas presionit nga ana e Kryeministrit të Shqipërisë, Edi Rama, por edhe të opinionit publik, zëvendëskryetari i ASH- së, prof. dr. Muzafer Korkuti, ka dhënë dje dorëheqjen.
Korkuti ka vënë në dijeni Kryesinë e Asamblesë së Akademisë së Shkencave për vendimin e marrë, vetëm pak orë nga rizgjedhja e tij. Pasi i falënderonte për besimin që ata i dhanë, duke e rizgjedhur në Kryesinë e ASH, Korkuti njoftonte dorëheqjen për arsye personale. "Të nderuar kolegë, anëtarë të Asamblesë, duke ju falënderuar për rivotimin në postin e zv. kryetarit të Akademisë së Shkencave, për arsye personale jap dorëheqjen time të parevokueshme nga ky post", shkruan Korkuti. Vetë akademiku nuk ka dashur të shprehet më gjatë për mediat, nëse vendimi i marrë prej tij kishte lidhje me situatën e krijuar së fundmi, pak ditë para zgjedhjeve për Kryesinë e Akademisë së Shkencave, për t'u përshkallëzuar edhe më shumë pas këtij procesi. Ai është mjaftuar duke thënë se janë thjesht arsye personale. Po kështu, edhe nga ana e ASH-së, duke iu referuar dorëheqjes së Korkutit, jepet i njëjti motivacion. Pas këtij vendimi, duke u bazuar mbi ligjin për Akademinë e Shkencave, ky institucion duhet të rihapë fushatën për zgjedhjen e zëvendëskrye- tarit të ri. Vendim që do të merret me gjasë në mbledhjen e radhës së Asamblesë dhe, në datën që do të caktohet, do të votohet po nga kjo e fundit. RIZGJEDHJA Deri para disa ditësh, Muzafer Korkuti mbante postin e kryetarit të Akade- misë së Shkencave, ndërsa më herët ka mbajtur atë të zv. kryetarit. Edhe në shtator të vitit 2013 ndodhi i njëjti proces, ai i këmbimit të vendeve mes kryetarit dhe zëvendëskryetarit, përkatësisht Gudar Beqirajt dhe Muzafer Korkutit. Ditën e hënë, kur u rizgjodh në pos- tin e zëvendëskryetarit, Korkuti u shpreh se nuk kishte dashur të kandidonte, por ishte këmbëngulja e kolegëve që e shtyu të merrte pjesë në garë. "Vura kandidaturën për të vazhduar reformën, sepse unë kam 55 vjet jetë në këtë institucion dhe e njoh shumë më mirë se kolegët e rinj. Nuk doja ta vija kandidaturën time, por pata presion nga kolegët, për të vazhduar të kontribuoj në këtë proces reformimi", tha Korkuti për mediat. Ai u rizgjodh në postin e zv. kryetarit me 27 vota pro, 3 kundër dhe një abstenim. Por, nën presionin e këtyre ditëve, kur Akademia e Shkencave është vënë nën shënjestrën e opinionit publik, Korkuti ka preferuar t'i largohet "farsës", për të vijuar me aktivitetin e tij shkencor. Muzafer Korkuti, akademik i përhershëm i Akademisë së Shkencave, tashmë 81 vjeç, është një nga figurat më të rëndësishme të arkeologjisë shqiptare. Autor i sa e sa veprave shkencore, lektor në Universitetin e Tiranës, Prishtinës, por edhe universitete të huaja, Korkuti është anëtar korrespondent i Institutit Arkeologjik Gjerman, që nga 1986 dhe korrespondent i Institutit Arkeologjik Amerikan që në vitin 2010.
Vura kandidaturën për të vazhduar reformën, sepse unë kam 55 vjet jetë në këtë institucion dhe e njoh shumë më mirë se kolegët e rinj. Nuk doja ta vija kandidaturën time, por pata presion nga kolegët, për të vazhduar të kontribuoj në këtë proces reformimi