Voltana Ademi përshëndet Ramën: Suksese në Velipojë!

Kryetarja e Bashkisë së Shkodrës, Voltana Ademi, i uroi suksese dje Kryeministrit Rama dhe ministrave të tij në takimin e Velipojës, duke i kërkuar atij bashkëpunim për projektet që kjo bashki pret të realizohen. “Me këtë rast, dëshirojmë të sjellim në vëmendjen dhe prioritetet e kësaj qeverie disa nga projektet më madhore të Planit të Përgjithshëm Vendor ( PPV), hartuar me pjesëmarrjen e gjerë të komunitetit të Shkodrës: Rivitalizimi i hyrjes së Shkodrës ( perimetri Bërdicë-Shkodër); Përmirësim mobiliteti dhe aksesit ndërkufitar ( aksi rrugor Shirokë- Zogaj, përfshi pikën doganore); Mbyllja e unazës dhe zhvillimi i turizmit të integruar malor ( kompletimi i Unazës Shkodër-Shalë- ThethBogë- Koplik); Bypass lindor i qytetit Shkodër; Muzeu i artit pamor “Lin Delija”; Rikualifikim i ballinës ujore buzë liqenit të Shkodrës; Urbanizimi i plazhit të Velipojës dhe zonave informale Mark Lula, Kiras, Rrethina; Qendra e Trajtimit të Ujërave të Zeza Shkodër”, thuhet në reagimin e kryetares së Bashkisë. Ajo vlerëson faktin që takimi informal i Kryeministrit me ministrat e tij zhvillohet në territorin e Bashkisë së Shkodrës, duke e parë si një mundësi e mirë për më shumë vëmendje. “Bashkia dhe kryetarja Ademi urojnë vërtet që qeveria e re ta ketë seriozisht dhe gjithnjë në prioritetet e saj, ashtu si në këtë mbledhje të parë, territorin e Bashkisë Shkodër. Presim që ky takim i qeverisë të ushqejë një tryezë dialogu mes pushtetit vendor dhe qendror për materializimin e projekteve të propozuara për Shkodrën, duke i garantuar, nga ana tjetër, bashkëpunim dhe mirëkuptim të ndërsjellë”, thuhet në njoftimin e Bashkisë dhe kryetares së saj, Voltana Ademi.