Përplasja për institutet, akademikët s'bien në një mendje

"Mendoj që Akademia duhet të ketë institutet e saj, me të cilët ajo do të ndihet e gjallë, do të ketë produkt". Kështu u shpreh kryetari i sapozgjedhur i Akademisë së Shkencave, Gudar Beqiraj, menjëherë pas rizgjedhjes së tij në krye të ASH. Beqiraj u shpreh se ishte në një mendje me Kryeministrin e Shqipërisë, Edi Rama, që ky institucion duhej reformuar dhe këtë do ta kryente ASH në bashkëpunim me qeverinë. I pyetur nga mediat se ku konsistonte reforma që ai do të ndërmerrte, ai shprehet se "Duke qenë matematikan, jam i parimit që Akademia e Shkencave duhet të jetë frytdhënëse, produktive për të realizuar detyra të ndryshme që ka qeveria për ekonominë shqiptare, duke filluar nga ujërat, energjinë, bujqësinë etj". Sipas mendimit të tij, edhe Albanologjia duhet të jetë nën çatinë e Akademisë së Shkencave. "Albanologjia duhet të jetë nën Akademinë e Shkencave, ashtu siç ka qenë edhe më parë", tha Beqiraj. Ndërkohë, tërësisht kundër këtij bashkimi është akademiku Beqir Meta. Sipas tij nuk do të kishte asnjë kuptim rikthimi i instituteve në varësi të Akademisë, pasi secili prej tyre ka një mision më vete dhe do të ishte veçse një shtim strukturash. Kryetari i Qendrës së Studimeve Albanologjike, akademik Marenglen Verli, edhe pse thotë se bashkimi ose jo i këtyre institucioneve është një çështje që i takon qeverisë, mendon se do të ishte e papërshtatshme që vetëm Albanologjia të kalonte nën varësinë e Akademisë, sepse institutet shkencore, të shpërndara nëpër universitete 12 vjet më parë, sot rezultojnë pa asnjë impakt, ndërsa laboratorët e tyre janë shkatërruar. Por edhe për kërkimin shkencor nëpër universitete ai ka rezervat e veta. Por pavarësisht mendimeve të njërit e tjetrit, me gjasë, është qeveria ajo që do të thotë fjalën e fundit.