Rrahu gjyqtaren, si kërkoi Kasemi ulje dënimi në Apel
Apeli ndaj Gjykatës: Jam kryefamiljar, kam dy fëmijë të mitur
Fadil Kasemi e ka konsideruar si shumë të rëndë dënimin me 3 vjet burg të dhënë ndaj tij nga Gjykata e Kavajës, për ngjarjen e korrikut 2015, kur ai dhunoi dhe kërcënoi me armë ish- bashkëshorten gjyqtare, Fildes Hafizi.
Në ankimin e bërë në Apelin e Durrësit ndaj këtij vendimi, Kasemi ka kërkuar uljen e masës së dënimit, duke pretenduar si rrethanë lehtësuese faktin se kishte dy fëmijë të mitur. Nga ana tjetër, organi i akuzës ka kërkuar ashpërsimin e dënimit, por pa ndryshuar kualifikimin e veprës penale për të. Gjithçka zbardhet në vendimin e Apelit Durrës, i shpallur më 28 shtator 2016, një kopje e të cilit është siguruar nga "Panorama". Arsyetimi i vendimi zbardh detaje në lidhje me pretendimet e Kasemit dhe Prokurorisë, gjatë përballjes së tij me drejtësinë si i akuzuar për "mbajtje pa leje të armëve luftarake" dhe "dhunë në familje" në dëm të gjyqtares Fildes Hafizi, e vrarë prej tij të enjten e kaluar në zonën e "Xhamllikut" në Tiranë.
ARGUMENTET E KASEMIT
Referuar vendimit të Apelit Durrës, në ankimin e paraqitur në këtë gjykatë, i pandehuri Kasemi ka pretenduar se nuk është dakord me vendimin e Shkallës së Parë. Ai kërkonte ndryshimin e vendimi për sa i përket masës së dënimit dhe dhënien e një mase me 2 vjet burgim, duke parashtruar disa shkaqe. Shkaku i parë i pretenduar prej tij ishte fakti se "masat e dënimit janë shumë të rënda". Më tej, në ankimin e paraqitur nga Kasemi vijohej: "Vepra penale e armëmbajtjes pa leje ka në minimum dënimin me gjobë, pistoleta është gjendur në çantë dhe nuk është përdorur nga i pandehuri, nuk rezulton të ketë qenë problematik, kështu që masa e dënimit nuk përligjet". Në ankim, Kasemi parashtronte edhe disa rrethana, sipas tij lehtësuese, që duhet të ishin marrë parasysh nga ana e Gjykatës së Shkallës së Parë. Sipas tij, dënimi i dhënë nuk përputhej me rrezikshmërinë e tij. "I pandehuri nuk rezul- ton të ketë qenë i dënuar më parë, është kryefamiljar dhe, pavarësisht se i divorcuar, ka dy fëmijë të mitur, veprën penale e ka kryer në gjendje të dehur nga rrethana të rastit, fakte që nuk janë mbajtur parasysh nga Gjykata e Shkallës së Parë, duke caktuar një dënim shumë të rëndë, jo në përputhje me rrezikshmërinë e autorit.
ANKIMI I PROKURORISE
Kundër vendimit të Shkallës së Parë Kavajë për dënimin e Fadil Kasemit ka qenë edhe Prokuroria e Durrësit. "Prokurori që nuk është dakord me vendimin e Gjykatës së Shkallës së Parë për sa i përket masës së dënimit, kërkon dënimin e të pandehurit përfundimisht me 4 vjet burgim, duke parashtruar shkaqet e mëposhtme: Vendi- mi i gjykatës për sa i përket masës së dënimit është i pabazuar në prova dhe në ligj. Gjykata në vendimin e saj nuk ka vlerësuar në masën e duhur rrezikshmërinë, si të veprës penale të prodhimit dhe mbajtjes pa leje të armëve luftarake e të dhunës në familje, vepra këto të kryera në një ambient të hapur plazhi e të mbipopulluar, ashtu dhe të autorit, të pandehurit Fadil Kasemi, i cili është nisur nga Tirana pikërisht për të kryer veprat penale për të cilat u gjykua e deklarua fajtor", citoheshin argumentet e ankimit të Prokurorisë në vendim.
ARSYETIMI I GJYKATES
Gjykata e Apelit Durrës, thuhej në arsyetimin e vendimit, pasi shqyrtoi e analizoi çështjen, arrin në përfundimin që: vendimi i Gjykatës së Shkallës së Parë është i drejtë dhe i bazuar, e duhet lënë në fuqi. Sipas treshes së Apelit, nga tërësia e njoftimeve që kanë dhënë provat e grumbulluara gjatë fazës së hetimeve paraprake, për shkak të procedimit me gjykim të shkurtuar, dosja hetimore bëhet pjesë e dosjes gjyqësore, rezulton e provuar që i pandehuri ka ushtruar dhunë fizike ndaj bashkëshortes së tij, në prani të fëmijës të tyre A. Kasemi dhe se pa lejen e organeve kompetente shtetërore, ka mbajtur armën e tipit pistoletë, si dhe municion luftarak, fishekë. "Gjykata e Apelit e gjen të drejtë vendimin e Gjykatës së Shkallës së Parë në kualifikimin ligjor të veprës penale të ' mbajtjes pa leje të armëve luftarake'". Kolegji Penal i Apelit ka gjetur të drejtë vendimin e Gjykatës së Shkallës së Parë edhe për sa i përket masës së dënimit me burgim dhënë ndaj të pandehurit. "Masa e dënimit penal është rezultat i vlerësimit të rrezikshmërisë shoqërore të veprës penale, shkallës së fajit të autorit të veprës penale, pasojave të ardhura nga vepra penale, si dhe rrethanave lehtësuese e rënduese". Sipas vendimit, pretendimi i mbrojtjes se duhet vlerësuar si rrethanë lehtësuese kryerja e veprës penale nga i pandehuri në gjendje të dehur, nuk mund të merret në konsideratë, për sa kohë që dehja nuk rezulton të jetë shkaktuar në rrethana të rastit dhe të ketë sjellë uljen e ekuilibrit mendor. "Gjykata e Apelit vlerëson se, ndryshe sa është parashtruar në ankimet respektive nga i pandehuri dhe prokurori, masa e dënimit e dhënë nga gjykata është në përshtatje me rrezikshmërinë shoqërore të veprës dhe autorit, rezultat i vlerësimit të drejtë të të gjithë elementeve dhe rrethanave që përbëjnë faktin penal".