U nisën me 4 tonë marijuanë në jaht, kapen 3 shqiptarët
Vlera e lëndës narkotike përllogaritet në rreth 20 milionë euro. Policia shqiptare: Jahti s’ka shkelur në ujërat tona
Policia italiane ka arritur të sekuestrojë një jaht me një ngarkesë prej 4 tonësh marijuanë. Në operacionin ndërkombëtar, ku u përfshi dhe Policia shqiptare, u arrestuan tre shtetas shqiptarë me inicialet F. M., E. V., dhe E. M.
Pas një ndjekjeje të gjatë të mjetit lundrues që mbante flamurin e SHBA- ve nga Guardia di Finanza e Foggias dhe me mbështetjen e një helikopteri, jahti u kap në ujërat territoriale italiane në zonën e Viestes, në orët e para të mëngjesit të së mërkurës. Në ekuipazhin e mjetit lundrues ndodheshin tre shtetas shqiptarë të moshës 26, 28 dhe 54 vjeç. Në total në bordin e jahtit u gjet një sasi prej 3 tonë e 992 kilogramë marijuanë. Nga ana e saj, Policia e Shtetit pretendon se në bazë të hetimeve paraprake, mjeti lundrues nuk ka shkelur në ujërat shqiptare, ndërsa nuk jepet më shumë informacion për shkak të sekretit hetimor. Ndërkohë shtohet se Policia e Shtetit po bashkëpunon ngushtë me Guardia di Finanza- n dhe Policinë italiane, si dhe po shkëmben informacione intensive me Policinë malazeze për zbardhjen e këtij trafiku. Nga burime jozyrtare mësohet se tre shqiptarët e arrestuar janë banues në Durrës dhe Tiranë. Policia shqiptare nuk bën të ditur identitetin e plotë të tyre dhe vendin nga ku është nisur jahti me katër tonë marijuanë, por mësohet se shqiptarët në bazë të sistemit TIMS rezultojnë se kanë hyrë në territorin e Mali të Zi gjatë ditës së hënë. Nga ky vend dyshohet se është nisur dhe mjeti lundrues me sasinë e madhe të lëndës narkotike në bord. Dyshohet se shqiptarët e kishin marrë me qira jahtin me qëllim që më pas ta përdornin për të trafikuar marijuanë drejt Italisë. Jahti me flamurin ameri- kan është pikasur nga Guardia di Finanza italiane në ujërat territoriale në zonën e Viestes dhe pas ndjekjes e me suport ajror, është bërë i mundur bllokimi i tij në det. Ndërkohë nuk dihet ende se nga e ka origjinën marijuana, por vlera e saj në treg do të arrinte 20 milionë euro. Pak ditë më parë, Policia italiane sekuestroi edhe 2.3 tonë kanabis që sapo ishte sh- karkuar nga një gomone oqeanike, e cila humbi gjurmët në ujërat malazeze dhe ato kroate. Pritësi i kësaj sasie ishte sërish një shqiptar që u arrestua, ndërsa nga analizat e zhvilluara mes Policisë italiane dhe asaj shqiptare rezulton se trafikantët janë duke shfrytëzuar rrugë alternative, jo më nga territori dhe ujërat shqiptare drejt Puljas, por në pjesën e sipërme të Adriatikut.