Biznesmeni arrestohet për dy atentate me eksploziv
Eduard Dushku, i dënuar për vrasje, kapet në Tiranë
Një biznesmen i akuzuar për dy atentate me eksploziv u arrestua dje gjatë operacionit policor të koduar me emrin "Deja vu".
Në pranga ka rënë shtetasi Eduard Dushku, 41 vjeç, banues në Tiranë, i dënuar më parë për veprën penale të "vrasjes". Policia tha se arrestimi i këtij shtetasi është bërë pasi hetimet zbardhën dhe dokumentuan me prova ligjore autorësinë e këtij shtetasi në dy ngjarje të vjetra të shkatërrimit të pronës me eksploziv, ngjarje këto të ndodhura në vitin 2014 dhe 2015. Burimet zyrtare thanë se urdhri i arrestit është lëshuar në datën 5 shtator për shtetasin Eduard Dushku, pasi është dokumentuar me prova ligjore që ky shtetas është autor i 2 ngjarjeve me eksploziv në Tiranë. Biznesmeni i njohur si pronar i një linje autobusësh në kryeqytet akuzohet si autor i ngjarjes së ndodhur më datë 09.12.2014, ku në vendin e quajtur "Sauk i Vjetër" është djegur me lëndë djegëse automjeti tip "BMW", në pronësi të shtetasit A. P., 65 vjeç. Ai akuzohet edhe për ngjarjen e ndodhur më datë 25.02.2015, ku në vendin e quajtur "Sauk i Vjetër" është dëmtuar me lëndë plasëse eksploziv lokali në pronësi të shtetasit A. B., 40 vjeç. Burimet zyrtare të Policisë kanë thënë se pas arrestimit të 41- vjeçarit dhe dokumentimit të provave ndaj tij, materialet iu referuan Prokurorisë së Rrethit Gjyqësor Tiranë, për veprat penale "shkatërrim prone me zjarr" dhe "shkatërrim prone me eksploziv".
PERSONAZHI Personi i arrestuar ditën e djeshme, shtetasi Eduard Dushku, rezulton të jetë me precedentë penalë dhe i dënuar më herët për vrasje. Biznesmeni u arrestua nga Policia e Tiranës në shtator 2011, pasi u kap me një armë pa leje pranë ish- Profarmës. Eduard Dushku, pronar i një linje autobusësh, është vënë në pranga asokohe në afërsi të ish- Profarmës në Tiranë. Ndaj tij Gjyka- ta kishte vendosur masën e sigurisë "arrest me burg" në mungesë, pasi Eduard Dushku, sipas Prokurorisë, është autor i vrasjes së Avdulla Vrapit, në gusht të vitit 2011. Vrasja ka ndodhur pas një zënke mes Albert Vrapit, djalit të viktimës, dhe Besnik Tresës, shofer autobusi, ku pronar i mjetit ishte Eduard Dushku. Konflikti ka nisur pas gërvishtjes së makinës së Albert Vrapit nga shoferi i autobusit, që më pas degradoi deri në vrasje.
VRASJA Vrasja për të cilën akuzohet Eduard Dushku ka ndodhur më 22 gusht 2011, kur Besnik Tresa, shofer i linjës Sauk- Shkolla e Baletit, gjatë kohës që po lëvizte në drejtim të një kompleksi, në një pjesë të ngushtë të rrugës, është fërkuar me pasqyrën e mjetit tip "Benz 240", e drejtuar nga Albert Vrapi. Tresa, pas incidentit, ka lajmëruar pronarin Dushku, duke e vënë në dijeni për ngjarjen. Albert Vrapi ka nisur të debatojë me punonjësit Tresa, ndërsa Eduard Dushku ka ndërhyrë duke i kërkuar Albert Vrapit të largohej dhe të mos krijonte probleme. Debati ka precipituar në veprime të dhunshme, ku të dyja palët kanë filluar të goditen me sende të forta. Gjatë përleshjes, Dushku ka nxjerrë nga çanta e tij një pistoletë pa leje dhe ka qëlluar disa herë me armën e zjarrit, duke vrarë Avdulla Vrapin, babanë e Albertit.