Putin: Kriza e Koresë mund të jetë e pamundur të zgjidhet

Trump me homologun kinez: Zgjidhja ushtarake, jo e para

Vladimir Putin ka deklaruar se kriza e Koresë së Veriut mund të jetë e pamundur të zgjidhet, ndërsa Kina po vazhdon përpjekjet me SHBA- të për të gjetur një zgjidhje diplomatike.

Në një bisedë telefonike me Kryeministren britanike një ditë më parë, Presidentit amerikan, Donald Trump, tha se tani nuk është koha për të biseduar me Korenë e Veriut, ndërsa gjatë një bisede telefonike me Presidentin e Kinës të mërkurën, Xi Jinping, Trump raportohet se ka pohuar që zgjidhja ushtarake nuk do të ishte zgjedhja e tij e parë. Alarmi më i madh vjen nga Presidenti i Rusisë, Vladimir Putin, i cili një ditë pasi parashikoi një katastrofë globale planetare, nëse çështja e Koresë së Veriut nuk zgjidhej me bisedime, të mërkurën pohoi se situata mund të jetë e pamundur të zgjidhet. Putin i bëri komentet pas takimit me Presidentin e Koresë së Jugut, Moon Jaein, në prag të Forumit Ekonomik Lindor në Vladivostok të Rusisë. Putin përsëriti pohimin e tij, se sanksionet dhe presioni nuk do të jenë të mjaftueshme për të frenuar Korenë e Veriut. "Mos iu dorëzoni emocioneve dhe të shtyni në cep Korenë e Veriut. Tani më shumë se kurrë, të gjithë duhet të jenë të qetë dhe të shmangim hapat që çojnë në një përshkallëzim të tensionit", tha Putin. Sipas tij, pa mjete politike dhe diplomatike, është jashtëzakonisht e vështirë të merresh me situatën. "Dhe për të qenë më i saktë, mendoj se nuk është fare e mundur", shtoi ai. Tensionet rreth pro- gramit bërthamor të Koresë së Veriut u intensifikuan gjatë kësaj jave, pasi të dielën e kaluar Peniani raportoi se e kishte testuar me sukses një bombë hidrogjeni që mund të montohej në një raketë. Testi shkaktoi një tërmet prej 6.3 ballësh në zonën e testimit, të konfirmuar nga monitoruesit amerikanë. Gjatë vizitës së tij në Rusi, Moon foli ngrohtësisht për marrëdhëniet e tij me Putinin, duke thënë se të dy ishin "miqësorë" dhe kishin të njëjtat synime. "Sidomos në lidhje me politikën e re të Lindjes dhe politikën e re të mbrojtjes që po ndjek, më bën të ndihem se po ëndërrojmë ëndrrën e njëjtë", tha Moon duke iu referuar Presidentit rus. Megjithatë, ai parashikoi një situatë të zymtë në Gadishullin korean. "Nëse provokimi i Koresë së Veriut nuk ndalet këtu, mendoj se mund të shkojmë në një situatë të pakontrollueshme", tha ai. Rusia ka luajtur një rol shumë më të dukshëm në krizën e Koresë së Veriut që prej testit nuklear. Sot, Putini pritet të zhvillojë bisedime me Kryeministrin japonez, Shinzo Abe.