Emërimet, Rama cakton tri deputete
Gjylameti, Bello e Kushi do koordinojnë emrat mes PS e ministrave
Kryeministri Edi Rama ka prezantuar dje para Grupit Parlamentar tri deputetet femra që do të merren me procesin e koordinimit të emërimeve në administratën publike.
Edi Rama ka caktuar si koordinatore të punësimeve në administratë, deputeten e qarkut të Tiranës, Blerina Gjylameti, deputeten e Elbasanit, Evis Kushi, dhe deputeten e Vlorës, Vilma Bello. Gjatë mbledhjes me dyer të mbyllura të Grupit Parlamentar të Partisë Socialiste, Rama ka sqaruar se çdo propozim i deputetëve apo i kryetarëve të degëve lokale të Partisë Socialiste për emërimet në administratë, qoftë në ministri apo drejtoritë e ndryshme, më parë duhet të kalojnë nga grupi i tre deputeteve. Me ngritjen e këtij grupi pune, deputetët apo krerët e degëve të Partisë Socialiste nuk do të kenë kontakt të drejtpërdrejtë me ministrat për të influencuar në emërimet në administratën publike apo në dikasteret e caktuara. Mësohet se gjatë mbledhjes, kryeministri ka sqaruar se grupi i koordinatorëve do të ketë si funksion të administrojë propozimet e deputetëve për emërimet në administratë. Ky grup do të bëjë dhe verifikimin e dokumentacionin dhe aftësive të personave që do të kërkojnë deputetët të emërojnë në shtet e do të koordinojnë me ministritë e ndryshme për të plotësuar nevojat për burime njerëzore në bazë të propozimeve dhe në bazë të performancës. Mësohet se Rama ka deklaruar gjatë mbledhjes së Grupit të PS se nuk do të lejohet asnjë emërim në administratën shtetërore pa nivelin e duhur profesional.
MARRËVESHJA Kryeministri ka deklaruar dje se nga e hëna do të votohet qeveria e re dhe do të prezantohet programi i saj politik. Rama ka deklaruar gjatë fjalës së tij se do të nënshkruajë një marrëveshje mirëkuptimi mes Qeverisë dhe Grupit Parlamentar. “Fillimjavën e ardhshme do të paraqesim në Kuvend qeverinë e re dhe programin e saj. Më pas do të zgjedhim edhe ekipin drejtues të këtij grupi parlamentar, si dhe kryetarët e komisioneve parlamentare. Ndërkohë, së bashku me kryetarin e ri të grupit, si dhe me kryetarin e Asamblesë Kombëtare kemi hartuar tekstin e Marrëveshjes së Mirëkuptimit mes qeverisë, grupit parlamentar dhe partisë, që do të nënshkruhet pas zgjedhjes së drejtuesve të grupit dhe të komisioneve parlamentare në prani të të gjithë grupit parlamentar nga përfaqësuesit e grupit, anëtarët e qeverisë dhe kryetari i Asamblesë Kombëtare, në emër të Partisë Socialiste. Është me shumë rëndësi të nënvizohet se disiplina e grupit dhe e qeverisë janë faktorë kyç në këtë legjislaturë, ashtu sikundër janë edhe një shprehi elementare dhe e domosdoshme e vullnetit për të qenë deri në fund seriozë, jo vetëm në raport me detyrimet ndaj zgjedhësve, por edhe në funksion të ndërtimit të të gjithë procesit të bashkëqeverisjes me njerëzit e zakonshëm”, ka thënë Rama.