Rama në Grupin e PS: Ministrat, të zëvendësueshëm
“Konkurrentët tanë gabojnë 100 herë nëse s’e votojnë Gramozin”
Kryeministri Edi Rama gjatë mbledhjes me dyer të mbyllura të Grupit Parlamentar të Partisë Socialiste, u ka bërë të qartë ministrave që nuk do të dorëzojnë mandatin e deputetit, siç bënë katërvjeçarin e shkuar. Ministrat, sipas Ramës, do të mbajnë edhe mandatin e deputetit, pasi ata mund të jenë të zëvendësueshëm në çdo kohë. Kryeministri ka thënë se ministrat do të vlerësohen në bazë të performancës dhe në rast se nuk arrihen objektivat, atëherë do të ketë zëvendësime. Personat e zgjedhur si ministra të kabinetit, sipas Ramës do të rikthehen të jenë deputetë të thjeshtë në Grupin Parlamentar, duke u lënë vendin emërimeve të reja. Po ashtu kryeministri i ka porositur ministrat e rinj që asnjëri prej tyre të mos largohet jashtë shtetit gjatë ditëve të enjte, ku si gjithmonë zhvillohen seancat parlamentare. Duke qenë se ministrat do të kenë dhe të drejtë vote, ata do të duhet të jenë të pranishëm në çdo seancë për të formuar kuorumin e nevojshëm prej 74 man- datesh dhe për të votuar nismat e qeverisë. Edi Rama ka kërkuar që në legjislaturën e re të këtë një koordinim më të mirë mes Grupit Parlamentar të PS- së, Parlamentit dhe Qeverisë, për të qenë në një linjë me nismat ligjore që do të ndërmerren.
Gjatë fjalës së tij para deputetëve të rinj, Kryeminis- tri Rama u ka dhënë dhe një mesazh demokratëve për kundërshtinë e kandidaturës së Gramoz Ruçit si kryetar i Parlamentit. Sipas kryeministrit, Ruçi është njeriu i duhur për postin e kryeparlamentarit dhe se demokratët gabojnë nëse nuk e votojnë atë. “Dua që ta nënvizoj shumë qartë për të gjithë ata që na dëgjojnë, se Gramozi nuk është njeriu i duhur për të investuar besimin tonë se është shoku ynë, por është shoku ynë, sepse është njeriu i duhur për të investuar besimin tonë.
Lejomëni që edhe në emrin e të gjithëve ju dhe të të gjithë atyre që na votuan më 25 qershor, t’u them konkurrentëve tanë demokratë se, nëse nuk e votojnë Gramozin nesër, gabojnë një herë, sepse refuzojnë deputetin me eksperiencën më të gjatë parlamentare, por duke e shënjestruar me topat e politikës së baltës, gabojnë 100 herë, sepse refuzojnë të kuptojnë që Shqipërisë as nuk i duhet dhe shqiptarët e shpërfillin lojën me topa balte mes politikanëve, sepse duan shtetin, punën dhe mirëqenien e tyre, që natyrisht nuk vijnë si rezultat i kësaj loje”, ka thënë Rama. Për kreun Qeverisë, sidoqoftë vota e opozitës, PS do të votojë me 74 votat e saj zgjedhjen e Gramoz Ruçit në postin e kreut të Kuvendit. “Sidoqoftë, nesër ne do ta konfirmojmë me votën e shumicës së 25 qershorit kandidaturën e Gramoz Ruçit në krye të Kuvendit”, u shpreh kryeministri.