Holanda i kërkon goditjen e grupeve shqiptare të kokainës
TIRANE - Franca dhe Holanda kërkojnë më shumë bashkëpunim me Policinë shqiptare në lidhje me goditjen e kriminalitetit dhe frenimin e azilkërkuesve që shfrytëzojnë lëvizjen pa viza në zonën Shengen. Përfaqësues të Policisë shqiptare morën pjesë në Konventën e Shefave të Policive Europiane, mbajtur në selinë e EUROPOL në Hagë, më 6 dhe 7 shtator. Në këtë aktivitet, drejtori i Përgjithshëm i Policisë shqiptare, Haki Çako, u takua me delegacionin e Policisë së Francës, një shtet që në periudhën korrik- gusht ngriti sinjalet e alarmit për numrin e azilkërkuesve nga Shqipëria. Në takimin me delegacionin e Policisë franceze u diskutua parandalimi i azilkërkuesve shqiptarë me destinacion vendet europiane, veçanërisht Francën. "Bashkëpunimi me Policinë shqiptare ka sjellë rënien e numrit të shtetasve shqiptarë që kërkojnë azil në Francë", theksoi kryesuesi i delegacionit francez, Jean-Philippe Lecouffe, drejtor i Policisë Gjyqësore në Xhandarmërinë Kombëtare Franceze. "Zyra e shtypit e Policisë theksoi se bashkëpunimi ndërpolicor u diskutua dhe lidhur me goditjen e grupeve kriminale shqipfolëse, të cilat operojnë në territorin francez, duke dako- rdësuar ngritjen e grupeve hetimore të përbashkëta, me qëllim hetimin, dërgimin para organeve të drejtësisë të autorëve të këtyre veprave penale, si dhe sekuestrimin e konfiskimin e aseteve kriminale që burojnë prej tyre". Nga ana tjetër, në deklaratë thuhet se në qendër të diskutimeve me del- egacionin e Policisë holandeze ishte intensifikimi i bashkëpunimit policor dypalësh, së pari në luftën ndaj krimit të organizuar, sidomos të organizatave kriminale shqipfolëse, të cilat operojnë kryesisht në trafikimin e lëndëve narkotike ( kokainë) nga Holanda në drejtim të vendeve të tjera eu- ropiane; së dyti, në identifikimin dhe kapjen e personave në kërkim ndërkombëtar, të cilët fshihen në territorin holandez. "Homologët holandezë u angazhuan në një shkëmbim më të lartë informacioni me palën shqiptare, ndërsa u dakordësua ngritja e grupeve hetimore të përbashkëta", theksoi Policia. Sipas saj, gjatë takimit të zhvilluar me delegacionin e Policisë spanjolle u diskutua rritja e bashkëpunimit në identifikimin dhe kapjen e personave në kërkim ndërkombëtar që fshihen në territorin spanjoll: në luftën kundër krimit të organizuar dhe krimeve të tjera, duke realizuar edhe operacione të përbashkëta ndërpolicore: në identifikimin e kontingjentit kriminal shqipfolës etj.