Burri rreh gruan, e kërcënon nga burgu edhe pas arrestimit
TIRANE - Burri i arrestuar për dhunë në familje kërcënon gruan nga burgu edhe pas arrestimit. Policia ka proceduar penalisht 40vjeçarin me inicialet A. L., i akuzuar se ka kërcënuar bashkëshorten e tij. Shtetasi, i cili ndodhet në burgun e Rrogozhinës, akuzohet se ka telefonuar gruan me inicialet E. L. dhe e ka kanosur. "Do të pendohesh për atë që bëre. Nuk do të shpëtosh nga unë", i ka thënë 40- vjeçari bashkëshortes së tij. Pas këtij kërcënimi, ka qenë bashkëshortja e 40- vjeçarit, e cila ka denoncuar ngjarjen pranë Komisariatit nr. 1. Ajo ka thënë se i shoqi e ka kërcënuar duke i thënë se "më fute në burg, por do ta shikosh kur të dal". Nga verifikimi i telefonatës, Policia ka njoftuar se është dokumentuar kërcënimi që shtetasi i burgosur me iniciale A. L. i kishte bërë bashkëshortes së tij. Policia e Tiranës bëri me dije se pas hetimeve të para, e ka referuar ngjarjen në Prokurori, ku e akuzon për përdorim me keqdashje të thirrjeve telefonike. Kjo vepër penale parashikon dënim nga gjobë deri në 3 vite burg. Ndërkohë një tjetër rast dhune është regjistruar në kryeqytet me autore gruan dhe të dëmtuar burrin. "Më datë 06.09.2017, u plotësua kërkesë- padia për lëshimin e urdhrit të mbrojtjes së menjëhershme për shtetasin Q. B., vjeç 41, i dënuar me parë, pasi dyshohet se ish- bashkëshortja H. B., 38 vjeçe, banuese në Tiranë, ka ushtruar në vazhdimësi dhunë psikologjike ndaj tij", ka thënë Policia. Sipas saj, materialet i kaluan Gjykatës së Rrethit Gjyqësor Tiranë. Ligji nr. 9669, datë 18.12.2006, "Për masa ndaj dhunës në marrëdhëniet familjare". Një tjetër rast i dhunës në familje ka ndodhur në Kavajë, ku sipas policisë, më datë 06.09.2017, u referuan materialet në Prokurorinë e Rrethit Gjyqësor Kavajë për shtetasin J. K., 43 vjeç, pasi dyshohet se në banesë ka ushtruar dhunë psikologjike ndaj bashkëshortes E. K., 30 vjeçe, së cilës iu plotësua kërkesëpadia për lëshimin e urdhrit të mbrojtjes. "Materialet i kaluan Gjykatës së Rrethit Gjyqësore Tiranë. Ligji nr. 9669, datë 18.12.2006, "Për masa ndaj dhunës në marrëdhëniet familjare", ka bërë me dije Policia. Pas denoncimeve për dhunë në familje, sipas ligjeve në fuqi, Policia plotëson dosjen e urdhrit të mbrojtjes për palën e dëmtuar. Dosja më pas i kalon Gjykatës për shqyrtim, ku vendoset lëshimi ose jo i urdhrit të mbrojtjes.