Presidenti Meta dekreton Qeverinë
Presidenti Ilir Meta nuk ka humbur kohë, por ka dekretuar kabinetin e ri qeveritar. Menjëherë pas seancës së të shtunës, kreu i shtetit ka dekretuar Edi Ramën si kryeministër të Shqipërisë. Menjëherë Kryeministri Rama i ka dërguar kreut të shtetit listën me 13 ministra dhe zv. kryeministres. Ndryshe nga procedurat e ndjekura më parë, ku emrat e propozuar merreshin në shqyrtim deri në limitet kushtetuese të kohës, kreu i shtetit nuk ngurroi dje të firmosë dekretin, duke i hapur rrugë procesit të votimit në Parlament. Madje, Meta ka preferuar të dekretojë Qeverinë e re përpara nisjes së vizitës së tij në Itali. Ndërkohë që procedura parashikon që Parlamenti duhet të shqyrtojë dekretet e Presidentit të Republikës brenda 10 ditësh. Dekretimi i ministrave të qeverisë “Rama 2” nga Presidenti i Republikës, i hap rrugë prezantimit në Kuvend të programit qeverisës nga ana e Kryeministrit Rama dhe marrjen e votës nga Parlamenti. Seanca e sotme do të ketë diskutime nga pothuaj të gjithë deputetët për programin qeverisës të kabinetit “Rama 2”.
Rilidhemi në këtë hapësirë komunikimi të së dielës pas ndërprerjes verore dhe fillimin e një stine të re politike ku falë mbështetjes suaj të jashtëzakonshme, do të kemi një qeveri të re në koalicion me njerëzit e zakonshëm.
Dje kemi zgjedhur kryetarin e ri të Kuvendit, deputetin me përvojën më të gjatë parlamentare, i cili pa pikë dyshimi do jetë garant i palëkundur i bashkëjetesës mes shumicës qeverisëse dhe opozitës në Kuvend.
Keqardhje për sulmet dhe baltën ndaj kryetarit të ri të Kuvendit, të cilat janë jehonë e zbrazëtisë së ideve që ka karakterizuar opozitën për vite të tëra.
Koha do ta tregojë shumë shpejt ndryshimin e cilësisë në drejtimin e Kuvendit që nuk do të jetë më klubi i ligjëratave, pa rend dite, pa kufi etik e kohor, në një lumë fjalësh sipas hesapeve partiake e personale të ligjvënësve.
Nesër në orën 10 paradite do të marr fjalën në Kuvend për programin e qeverisë dhe pas marrjes së besimit nga Kuvendi, qeveria do të bëjë betimin dhe do të nisë menjëherë nga puna me mbledhjen e parë, e cila do të shpallë vitin mbarëkombëtar të Skënderbeut, si dhe do të vendosë për lehtësimet e para të barrës së burokracisë nga shpatullat e njerëzve të zakonshëm.
Shembull: Italia prodhon 1 mln certifikata lindjeje në vit për nevoja administrative të qytetarëve. Po Shqipëria?! 4.5 milionë. Më shumë certifikata të printuara në vit sesa vetë popullsia jonë brenda dhe jashtë vendit. 4.5 milionë udhëtime drejt zyrës së gjendjes civile. 4.5 milionë radha në vit vetëm për të vërtetuar se ti ekziston. 4.5 milionë futje dorës në xhep brenda një viti për të paguar dokumentin e ekzis- tencës tënde vetëm e vetëm që të marrësh një shërbim, një patentë, licencë etj. 4.5 milionë arsye për t’u mërzitur me këtë vend dhe me këtë shtet vetëm nga certifikata e lindjes. Po sa shumë arsye të tilla në xhunglën e letrës që prodhon pa kriter dhe pa karar shteti ynë duke u marrë kohën dhe frymën qytetarëve. Pa fund! Me certifikatën do të nisë eliminimi i dhjetëra miliona udhëtimeve, radha e kontakteve me sportelet e zyrave të shtetit, por ju lutem prisni edhe 2.7 ditë siç keni pritur 27 vjet dhe do dëgjoni jo më zotimin, por vendimin për të nisur lehtësimin e ndjeshëm të jetës suaj nga stresi juaj i kontakteve të tepërta dhe të rraskapitshme me zyrat e shtetit.
Qeveria e re është krijuar për të qenë një qeveri e juaj në kuptimin më konkret të fjalës. Një qeveri për të bërë progres të ndjeshëm në rrugën drejt Shqipërisë që duam me shtet, punë dhe mirëqenie. Ndryshimi i strukturës dhe i mekanizmave të qeverisë është vetëm në fillim dhe është fillimi i një procesi ndryshimi kapilar që do të shtrihet në gjithë organizmin e shtetit dhe që do të lehtësojë jetën e çdo qytetari në marrëdhënie me administratën. Do të ulë ndjeshëm korrupsionin dhe do të rrisë transparencën dhe shpejtësinë e shërbimeve për çdo qytetar. Do të fuqizojë ekonominë, do të rrisë sigurinë, do të përshpejtojë integrimin europian të vendit, që në fund të fundit është modernizim dhe demokratizim i pandalshëm.
Duke falënderuar edhe një herë ata që na dhanë këtë privilegj të jashtëzakonshëm, për t’i shërbyer vendit dhe njerëzve të zakonshëm të këtij vendi, për katër vjet të tjera, i siguroj që të gjithë pa përjashtim dhe pa dallim politike e përkatësish krahinore se unë do të jem me mish e me shpirt thjesht njëri prej jush, ma keni dhënë ose jo votën në timonin e qeverisjes së katër viteve të ardhshme.