Gjashtë të vdekur dhe dy të zhdukur nga moti në Toskana
Në dy orë, shi sa për 2 muaj, shkatërrohet jugu i Livornos
Gjashtë persona kanë humbur jetën dhe dy të tjerë rezultojnë të zhdukur nga moti i keq në rajonin Toskana të Italisë, kur shirat e rrëmbyer goditën qytetin Livorno, duke shkaktuar përmbytje në orët e para të së dielës.
Ranë 260 milimetra shi në dy orë, një sasi që normalisht bie në dy muaj. Uji ka goditur nga mesnata deri në orën 2 të mëngjesit qytetin, duke shkatërruar pjesën jugore të tij. Bilanci i viktimave mund të rritet. Katër nga viktimat kanë humbur jetën në një bodrum. Ata janë një fëmijë 2 vjeç, prindërit dhe gjyshi i tij. Trupat janë gjetur nga shërbimet e emergjencës gjatë operacioneve të shpëtimit. Nga kjo familje ka shpëtuar vetëm vajza katërvjeçare. Dy kufoma të tjera janë gjetur në dy rrugë të ndryshme. Emergjenca nuk ka përfunduar, ka thënë ad- ministrata në faqen e uebit. "Livorno nuk ka parë kurrë një mot kaq të keq", është shprehur kreu i Bashkisë së Livornos, Filippo Nogarin, në një video të postuar në "Twitter", duke shtuar se parashikimet e motit nuk kishin paralajmëruar për një përmbytje kaq të egër në Italinë Qendrore. Në plazhin e famshëm "Tre Ponti", muri mbështetës i një ure ka rënë. Balta ka shkatërruar të gjithë plazhin duke marrë përpara makinat e parkuara, furgonë, skuter, etj. Janë edhe shumë shtëpi të dëmtuara. Në disa pika, uji ka arritur lartësinë dy metra duke përmbysur të gjitha katet e para të pallateve. Disa lagje periferike janë evakuuar. Kryeministri Paolo Gentiloni ka shprehur solidaritet me banorët e zonës së prekur nga përmbytjet me një mesazh në "Twitter": "E gjithë Italia ju përqafon # Livorno, ju jemi afër familjeve të viktimave, mbështetje e plotë për bashkinë, rajonin dhe shërbimet e emergjencës". Edhe një taskforcë psikologësh është gati për të ndërhyrë e për të mbështetur personat e përfshirë në tragjedi.
Shirat e rrëmbyer kanë goditur gjithashtu Romën, ku kryetarja e bashkisë, Virginia Raggi, u ka bërë thirrje qytetarëve që të qëndrojnë në shtëpi.