Kuvendi nis me disiplinën “fikës” të Ruçit, vetëm Basha merr kohë sa Rama
Orare preçize të nisjes së seancave dhe ndërprerje e fjalës për deputetët e maxhorancës e opozitës që kalojnë minutazhin
Periudha kur deputetët e opozitës flisnin pa fund në foltoren e Kuvendit duket se ka përfunduar. Dje Gramoz Ruçi u fiku mikrofonin të gjithë deputetëve pa përjashtim, të majtë e të djathtë, në rastin kur e tejkalonin minutazhin e programuar.
Si rrallë më parë, Parlamenti i nisi dje punimet në orën 9: 00, “fikës” siç Gramoz Ruçi i porositi deputetët e Partisë Socialiste ditën e hënë. Të vetmin “koncesion”, kreu i ri i Parlamentit e ka bërë për liderin e opozitës, Lulzim Basha, të cilit i vendosi në dispozicion 40 minuta, aq sa koha e Kryeministrit. Në legjislaturën e kaluar, punimet e Parlamentit njoftoheshin gjithnjë ditën e enjte, në orën 10: 00, por ato gjithmonë fillonin me një orë apo 2 orë me vonesë. Por duket se Gramoz Ruçi do t’i “korrigjojë” gabimet e legjislaturës, e cila u drejtua për katër vite nga Ilir Meta.
PUSHIMI Kreu i ri i Parlamentit ka lajmëruar deputetët, të cilët ishin regjistruar për të diskutuar programin e qeverisë që, në rast se nuk do të ishin të pranishëm në momentin që do t’u vinte radha për të folur, atëherë do t’u hiqej emri nga lista e diskutantëve. Kjo i detyroi demokratët të bëjnë një kërkesë të posaçme për ish- kryeministrin Sali Berisha, emri i të cilit ishte regjistruar në fund të listës, por sipas një shënimi ai do të fliste rreth pasdites. “Sali Berisha do të flasë rreth orës 13: 3015: 00, spostohet në radhë me një numër”, thuhet në shënimin që demokratët bënë në listën e diskutimeve. Ndërkohë që në legjislaturën e kaluar, Berisha fliste në çdo moment, mjafton të kërkonte fjalën. Asokohe, Ilir Meta nuk u rezistonte dot kërkesave të Berishës, madje duke e etiketuar ish- kryeministrin si “pika e tij e dobët”. Berisha foli dje 20 minuta dhe pak sekonda, më pas fjala iu ndërpre në mes nga Ruçi. Edhe pse Flamur Noka ofroi që koha e tij t’i jepej Berishës, Gramoz Ruçi nuk pranoi kompromise. Ai kërcënoi Berishën me sanksione dhe përjashtim nga punimet e Kuvendit nëse do të vazhdonte të mbante të bllokuar foltoren. Të njëjtin qëndrim Ruçi mbajti edhe për deputetët e Grupit të LSI- së, edhe këtyre të fun- dit iu hoq fjala kur tejkaluan minutazhin.
REPLIKAT Ajo që ra në sy ishte fakti se deputetët e opozitës e sulmuan Edi Ramën duke e përmendur me emër në çdo fjalim, por Kryeministri nuk kërkoi në asnjë rast t’u përgjigjej akuzave. Masat “shtrënguese” janë aplikuar dje edhe ndaj ministrave të propozuar nga Edi Rama, po ashtu dhe ndaj Grupit Parlamentar të PS- së. Seanca e djeshme mund të cilësohet si e vetmja ku nuk u bë asnjë replikë mes deputetëve, apo mes minis- trave të qeverisë dhe përfaqësuesve të opozitës. Edhe pse u përmendën me emra dhe mbiemra, askush nuk kërkoi që të replikojë. Madje, as Sali Berisha. Punimet e Parlamentit u ndërprenë dje për 40 minuta me kërkesë të deputetëve të Partisë Demokratike. Grupi i PD- së kërkoi leje nga Gramoz Ruçi për të shtyrë me 40 minuta punimet për shkak të homazheve që do të zhvillonin pranë memorialit të “Dëshmorit të kombit”, ishdeputetit Azem Hajdari. Gramoz Ruçi i njoftoi deputetët se seanca do të riniste “fikës” në orën 11: 30. Afat që u respektua me përpikëri. Në një kohë që deputetët e PDsë po bënin homazhe, socialistët e shfrytëzuan kohën për të pirë kafe në lokalet pranë Parlamentit. Por në orën 11: 25 socialistët janë ngritur nga kafja në grup dhe janë paraqitur në sallë, ku i priste Gramoz Ruçi, i cili rinisi punimet në orën 11: 30.