Miratohet struktura e re e Qeverisë, kompetencat dhe drejtoritë për çdo ministri

Ahmetaj merr edhe strehimin dhe administrimin e pronës shtetërore, Gjiknuri nga planifikimi urban te shërbimi postar

Në mbledhjen e parë të saj, Qeveria "Rama 2" miratoi kompetencat e reja të ministrive të saj. Pas shkurtimit të numrit të ministrive, nga 19 në 13, dhe rikompozimit të disa ministrive, në ditën e parë të punës së tyre, ministrat u njohën me kompetencat e tyre të reja.

Ministria më e madhe e krijuar, ajo e Infrastrukturës dhe Energjisë, përveç industrisë dhe minierat, ka në kompetencë të saj edhe zhvillimin urban dhe telekomunikacionin. Vendimi i qeverisë i përcakton kësaj ministrie të drejtuar nga Damian Gjiknuri një listë të gjatë përgjegjësish dhe kompetencash për të përmbushur që lidhen me

sektorin e planifikimit dhe zhvillimit urban, në sektorin e infrastrukturës dhe transportit, në sektorin e telekomunikacionit e shërbimit postar, në sektorin e energjisë, shfrytëzimit të burimeve energjetike e minerare dhe në sektorin e industrisë.

Një tjetër ministri me shumë përgjegjësi është edhe ajo e Financave dhe Ekonomisë, e cila brenda saj përfshin dhe punësimin. Arben Ahmetaj që drejton këtë ministri do të përgjigjet për administrimin e buxhetit të shtetit, menaxhimin e borxhit publik, por dhe fushën e strehimit, punësimit, fushën e arsimit dhe formimit profesional, si dhe administrimin e fondit të sigurimeve shoqërore. Një rol të ri merr dhe ministri i Jashtëm sa i takon procesit të anëtarësimit në BE. Ai do të bashkërendojë dhe fondet që vijnë nga Bashkimi Europian, që deri dje i menaxhonte Ministria e Integrimit Europian. “Misioni i Ministrisë për Europën dhe Punët e Jashtme është hartimi dhe zbatimi i politikave të jashtme, drejtimi teknik dhe bashkërendimi i procesit të integrimit të Republikës së Shqipërisë në Bashkimin Europian, zhvillimi dhe fuqizimi i diplomacisë ekonomike, si dhe bashkërendimi i ndihmave financiare nga Bashkimi Europian”, thuhet në vendimin e qeverisë për përgjegjësitë e Ministrisë për Europën dhe Punët e Jashtme.

Për të përmirësuar marrëdhënien e biznesit me administratën publike dhe zyrat e shtetit, kryeministri emëroi Sonila Qaton si ministre Shteti për Mbrojtjen e Sipërmarrjes. Kompetencat dhe përgjegjësitë e saj janë shumë strikte dhe autoritare. “Ministri i Shtetit për Mbrojtjen e Sipërmarrjes: Investigon dhe trajton ankesat administrative të sipërmarrjeve private, përfshirë ato të investitorëve strategjikë dhe/ ose të huaj, kundrejt institucioneve publike, të cilat përf- shijnë institucionet publike të pushtetit qendror, vendor, shoqërive publike, si dhe të zyrtarëve të tyre; Ndërmjetëson komunikimin e sipërmarrjes me institucionet publike për zbatimin e kontratave, si dhe zhvillon mekanizma të zgjidhjes para- prake të mosmarrëveshjeve midis tyre”, thuhet në vendimin e djeshëm të qeverisë. Përgjegjësi të reja sa i takon marrëdhënies me diasporën merr dhe Pandeli Majko në postin e ministrit të Shtetit për Diasporën. Majkos i kërkohet të koordinojë pro- cesin për të garantuar regjistrimin dhe të drejtën e pjesëmarrjes së diasporës në votime, në bashkëpunim me Ministrinë e Brendshme dhe Ministrinë e Drejtësisë, si dhe organizimin e drejtimin e krijimit të Agjencisë Shtetërore të Diasporës.