Fshehu dënimin, në hetim oficerja
TIRANE – Ish- farmacistja e maternitetit “Mbretëresha Geraldinë”, aktualisht nënkomisare policie në Komisariatin nr. 1 të Tiranës, Marie Dobra, është pezulluar nga detyra dhe po hetohet nga SHÇBA për falsifikim të vulave, stampave dhe formularëve zyrtarë. Mësohet se ajo ka falsifikuar formularin e dekriminalizimit, duke mos deklaruar se ka qenë e dënuar më parë, edhe pse ka rezultuar se ka qenë e dënuar me 18 muaj burg për shpërdorim detyre. Burime zyrtare nga Ministria e Brendshme thanë dje se SHÇBA, në bashkëpunim me Prokurorinë e Tiranës, në përfundim të një hetimi, kanë pezulluar nga detyra një oficere Policie për shkak të falsi- fikimit të formularit të dekriminalizimit. “Nga veprimet hetimore ka rezultuar se punonjësja e Policisë, nënkomisare Marie Dobra, me detyrë specialiste informacioni dhe për marrjen e kallëzimeve në Seksionin e Policimit në Komunitet pranë Komisariatit nr. 1 Tiranë, ka qenë më parë e dënuar me 18 muaj burg për veprën penale ‘ shpërdorim detyre’. Këtë dënim ajo nuk e ka bërë të ditur gjatë plotësimit të formularit të dekriminalizimit për punonjësit e shtetit, duke shënuar në formular si ‘ e padënuar’”, tha dje Ministria e Brendshme. Për këtë arsye, Prokuroria ka kërkuar pranë Gjykatës së Shkallës së Parë Tiranë caktimin e masës së sig- urimit personal për punonjësen e Policisë. Gjykata, në bazë të këtyre të dhënave ka vendosur caktimin e masave shtrënguese “mosushtrim i detyrës” dhe “detyrim paraqitjeje pranë Policisë Gjyqësore” për oficeren Marie Dobra. Ajo rezulton e dënuar nga Gjykata e Tiranës, me një vendim të vitit 2014, që është lënë në fuqi më pas edhe nga Gjykata e Apelit, bashkë me 3 punonjëse të tjera të maternitetit “Mbretëresha Geraldinë”. Në përfundim të procesit gjyqësor, për një çështje që kishte të bënte me falsifikimi dhe vjedhje ilaçesh, u shpallën fajtore 2 farmaciste, njëra prej të cilave ishte Marie Dobra, një kryemami dhe një kryeinfermiere.