Bashkia kundër HEC- it në Theth: Duhej të na merrej mendimi ne dhe banorëve
"Janë cenuar dispozitat ligjore dhe konventat ndërkombëtare"
Bashkia Shkodër e quan të paligjshme dhënien me koncesion të hidrocentralit në Theth që do të ndërtohet në lumin e Shalës.
Qeveria shqiptare miratoi dhënien me koncesion për subjektin "bashkimi i operatorëve të shoqërive ' Çinar- San Hafriyat Nakliyat Insaat Turizm Sanayi Ve Ticaret LTD. STI', ' Shala Energy PLC' dhe ' Falak Properties LLC'" me një vlerë prej 84 milionë eurosh, me një afat prej 36 muajsh për zbatimin e projektit. Pasi ky lajm u bë i ditur përmes mediave, Bashkia Shkodër ka marrë informacion në lidhje me procedurat e dhënies së këtij koncesioni. Përmes një shkrese zyrtare drejtuar Ministrisë së Energjisë, bashkia thekson se janë shkelur rëndë procedurat e dhënies së këtij koncesioni për ndërtimin e tre HEC- eve në lumin e Shalës. "Bashkia Shkodër, menjëherë sapo është njoftuar përmes medias për dhënien e një koncesioni për ndërtimin e një hidrocentrali në Theth mbi lumin e Shalës, ka ndërmarrë veprimet për informimin mbi dhënien e këtij koncesioni. Bashkia Shkodër e shqetësuar vëren se nuk janë zbatuar dispozitat ligjore në dhënien me koncesion të objektit të mësipërm, janë cenuar rëndë dispozitat ligjore dhe konventat ndërkombëtare mbi zonat e mbrojtura dhe konventa Aarhus", bën të ditur Bashkia Shkodër në shkresën e saj. Më tej pretendimet e bashkisë vijojnë edhe në mënyrë të detajuar, duke treguar disa prej shkeljeve që janë bërë. "Dokumentacioni i koncesionit duhet të përmbante ndërmjet të tjerash edhe studimin e fizibilitetit". Përveç këtyre shkeljeve, Bashkia Shkodër thekson në shkresën zyrtare të saj se duhej të kishte qenë pjesë e procesit në dhënien me koncesion dhe jo të anashkalohej siç ka ndodhur. "Nëse ky studim do të ishte hartuar në kohën e duhur dhe bërë i njohur publikisht, palët që do të duhej të ishin pjesë e procesit janë zhvilluesi i projektit, Ministria e Energjisë, Ministria e Mjedisit dhe strukturat e saj të varësisë. Duhej të ishte Bashkia Shkodër, publiku, OJQ, si dhe institucionet që kanë përgjegjësi të përfshihen në procesin e studimit mjedisor. Bashkisë Shkodër i është mohuar dhënia e opinionit dhe marrja pjesë në këtë proces. Bashkisë Shkodër asnjëherë nuk i është dërguar një studim i tillë apo t'i jetë kërkuar mendim lidhur me studimin e kryer, nëse një i tillë ekziston", thuhej në reagimin e bashkisë. HEC- et në Shalë, sipas një sqarimi të Ministrisë së Energjisë përpara këtij reagimi të Bashkisë Shkodër, nuk prekin mjedisin në lumin e Shalës, janë larg zonave të banuara, nuk dëmtojnë asgjë, si dhe i japin asaj zone zhvillim ekonomik dhe një mbrojtje e zhvillim të ekosistemit.
Nëse ky studim do të ishte hartuar në kohën e duhur dhe bërë i njohur publikisht, palët që do të duhej të ishin pjesë e procesit janë zhvilluesi i projektit, Ministria e Energjisë, Ministria e Mjedisit dhe strukturat e saj të varësisë”