Kukësi e Teuta shijojnë humbjen, Tirana nis mbrojtjen e trofeut
Mlladen Milinkoviç ka shijuar humbjen si trajner i Kukësit në turin e parë të Kupës së Shqipërisë, pas disfatës së skuadrës së tij ndaj Egnatias. Ndonëse verilindorët kishin udhëtuar me lojtarët rezervë drejt Rrogozhinës për këtë duel, pakkush priste që ata të komplikonin kualifikimin me një disfatë në transfertë. Gjithçka u vendos që në minutat e para të sfidës, kur Memini u dënua me karton të kuq për Kukësin dhe Bakiasi shënoi golin e vetëm të takimit për skuadrën vendase.
Teuta - Një tjetër skuadër e Superiores që ka provuar humbjen ishte edhe Teuta, e cila kishte lënë pushim disa prej titullarëve me transfertën në Pukë ndaj Tërbunit vendas. Goli i Stivi Shabës në pjesën e dytë u dha suksesin pukjanëve, ndërsa detyron Maganin të luajë me forca të plota në takimin e kthimit pas dy javësh.
KAMPIONËT
Tiranës iu desh që të realizonte një përmbysje rezultati në mënyrë që t'i dhuronte suksesin që në ndeshjen e parë në transfertë Ze Marias, i cili dje kishte provën e parë të vërtetë të vështirësisë me të cilën do të përballet në futbollin shqiptar. Perja përfitoi nga një gafë e Likës për të dërguar topin në rrjetë dhe për t'i dhënë avantazhin Besës në ndeshjen e cila filloi me 15 minuta vonesë për shkak të mungesës së forcave të ren- dit në stadium. Por ishte kapiteni Karabeci ai që realizoi nga një gol në secilën pjesë të takimit, për të përmbysur shifrat dhe për të marrë një fitore 2- 1 në transfertë që ia bën më të thjeshtë rrugëtimin në këtë turne, i cili është shpresa e vetme e Tiranës për të luajtur në Eu- ropë në sezonin e ardhshëm.
GRUPI B
Në Grupin B, Partizani fitoi me goleadë 2- 6 në Kuçovë në ndeshjen ndaj Naftëtarit. Vendasit kaluan të parët në avantazh me anë të Nallbatit, por të kuqtë më pas përmbysën shifrat me golat e Xhixhuas që shënoi dopietë dhe realizimet e Malotës, Çanit, Herrerës dhe Bathës me penallti. Sulmuesi Edgar Çani u fut në lojë në pjesën e dytë dhe debutoi me gol me fanellën e Partizanit. Flamurtari fitoi pastër 0- 2 ndaj Dinamos në takimin e luajtur në kompleksin "Internacional" në Pezë- Helmes. Hoxhaj dhe Musta ishin autorët e golave për këtë fitore të vlonjatëve. Në takimet e tjera, Turbina mposhti Korabin, Apolonia barazoi me Lushnjën, Pogradeci mposhti Shkumbinin në Peqin dhe Luftëtari mposhti Elbasanin në transfertë. Ndeshja mes Tomorit dhe Bylisit u ndërpre për shkak të largimit të forcave të rendit.