Qëndrimi i Berishës, Basha: Tregoi se jam unë që vendos në PD
Përgjigjet e kreut të PD për listat dhe të pakënaqurit: Nuk pranoj shantazhe, por ata do të kenë vendin e tyre në PD
Kreu i PD- së, Lulzim Basha, deklaroi se të gjitha figurat me kontribute në PD do të kenë vendin e tyre në PD, përfshirë edhe kritikët e tij më të ashpër.
Në një intervistë për emisionin “Opinion” të gazetarit Blendi Fevziu, Basha deklaroi se vija e kuqe që do të ndajë atë vetë me kritikët, do të jetë qëndrimi që ata do të mbajnë në raport me Partinë Demokratike. Lidhur me kritikat e forta të ish- kryeministrit Berisha në drejtim të tij në një intervistë të dhënë dy ditë më parë, Basha deklaroi se Berisha konfirmoi atë që ai e thotë prej kohësh, që vendimet në PD i takojnë Lulzim Bashës. Kreu i PD- së shpjegoi edhe arsyet e marrëveshjes me Edi Ramën dhe ritheksoi se marrëveshja me të ka vdekur.
Si i keni lexuar kritikat e ish- kreut të Partisë Demokratike, Sali Berisha?
Unë gjithmonë ju kam thënë se konsultohem me z. Berisha, për shkak të përvojës së jashtëzakonshme që ai ka si themelues dhe lider i PD- së, siç konsultohem me autoritete të tjera, por jam unë që marr peshën e vendimeve politike që i takojnë kryetarit të PD- së. Të paktën pas intervistës së z. Berisha, pyetja se kush e drejton PD-në ka marrë një përgjigje definitive.
Mos keni dashur ju të lini të kuptohet që ju fshiheni pas z. Berisha për t’i lënë atij një përgjegjësi? Apo edhe z. Berisha ka bërë të njëjtën gjë?
Ky vend ka probleme shumë të rënda. Pa dyshim që opozita e vendit duhet konspektuar me mosbesim nga gazetarët për gjithçka që bën dhe a i shërben siç duhet interesit publik. Por koha dhe vëmendja që i është derdhur kësaj çështjeje tash katër vite është disproporcionale me interesin publik. Prej ditës së parë ju kam thënë se unë marr peshën e plotë të përgjegjësisë si kryetar i PD- së. Prej ditës së parë, Sali Berisha ka thënë që unë nuk përzihem në vendimmarrjen e PD- së, kjo i takon kryetarit të ri. Është zgjedhur për shkak të natyrës konspirative të njeriut apo për diversion të pastër politik për të mos u besuar diçka që ne e kemi thënë në mënyrë të përsëritur, secili nga pozitat e veta, kjo meriton analizë për ata që flasin. Intervista nuk ka asgjë më shumë sesa një konfirmim i kësaj që ju keni dëgjuar në mënyrë të prerë.
Cilët ishin këshilltarët tuaj që Berisha u tha “mizerabël” në atë intervistë? Çfarë mendoni për qëndrimin që Berisha mbajti për marrëveshjen?
Nuk kemi ardhur të komentojmë atë intervistë këtu. Vlerësimi im për çështjen e marrëveshjes është ky: unë kam një qëndrim ndryshe nga z. Berisha për marrëveshjen e 18 majit. Z. Berisha e cilësoi atë marrëveshje si një fitore të shkëlqyer. Për mua marrëveshja erdhi në kushtet e një detyrimi absolut. Këtë shpjegim ua kam dhënë të parëve militantëve të PD-së gjatë fushatës zgjedhore në parti. Marrëveshja politike e 18 majit, që erdhi pas ndërhyrjes amerikane, absolutisht nuk ishte objektivi im politik. Objektivi im politik ishte largimi i Edi Ramës. Bindja ime më e thellë ishte që me Edi Ramën Kryeministër, çfarëdo tjetër të arrinim, nuk do të garantonim dot votën e lirë. T’u duk djalë i mirë Edi Rama? Lëri këto tani. Ta them unë se çfarë ndodhi. Pas refuzimit të dy apo tri ndërhyrjeve europiane dhe pas letrave të hapura nga Brukseli për t’u bërë thirrje shqiptarëve të votonin edhe pa opozitën, erdhi misioni amerikan, i cili propozoi paketën “McAllister +”. Edhe kjo paketë përfshinte Ramën Kryeministër. Në këtë moment, PD dhe unë si kryetar i saj kishim këto zgjedhje: E para të vazhdonim linjën tonë konsekuente dhe t’i thohim “Jo” edhe këtij propozimi amerikan. Me thellësinë e shpirtit tim, atëherë kur bëra marrëveshjen dhe sot pas marrëveshjes dhe pas zgjedhjeve, ky, në kuptimin e vlerave, do të ishte një qëndrim i drejtë. Isha i bindur që me Edi Ramën nuk do të kishim zgjedhje të lira dhe të ndershme. çfarëdo të ndodhte, na u bë fare e qartë. Nëse PD dhe aleatët e saj do të refuzonin edhe këtë shans të fundit, SHBA nuk do të kishte asnjë mundësi tjetër, përveçse t’i bashkoheshin qëndrimit të Brukselit që mund të kishte zgjedhje edhe pa opozitën. Në këto kushte, pesha e vendimmarrjes ishte kjo. Nëse PD do të vazhdonte, për herë të parë në historinë 27- vjeçare të saj PD nuk do të merrte pjesë në zgjedhje. E dyta, me gjasa, do të kishim një izolim ndërkombëtar, pavarësisht kauzës sonë të drejtë. Dhe e treta, në Parlament Rama do të emëronte opozitën e tij. Në këto kushte, vendimmarrja ishte e detyruar. Në momentin që u mor vendimi, detyra ime ishte të mobilizoja qytetarët dhe partinë time. Do të vazhdojë marrëveshja për reforma të rëndësishme? Marrëveshja ishin zgjedhjet e lira dhe të ndershme. A bëri pala tjetër diçka për të bërë zgjedhje të lira dhe të ndershme? E kundërta. Bëri gjithçka që, siç edhe vetë e quan, avazin e vjetër. Që në këtë moment nuk ka më marrëveshje. Sepse thelbi i marrëveshjes ishin zgjedhjet e lira dhe të ndershme, pastaj si një fluks i shpresës për fatet e reja politike të vendit kishte edhe një angazhim për hapa të përbashkët për reforma të rëndësishme. Por kur hapi i parë hidhet në erë si rezultat i mosmbajtjes së fjalës nga njëra palë, që ishte qeveria, që ishte Edi Rama, atëherë çfarë prisni që të vazhdohet me hapa të tjerë. Ura për të shkuar te hapat e tjerë ishin zgjedhjet e lira dhe të ndershme. Ndaj edhe thirrja ime është fare e qartë: Rivendosja e institucionit të zgjedhjeve është përcaktuese. Asgjë tjetër nuk mund të ndodhë, pa një reformë të sistemit politik. Po nëse ai thotë hajde e bëjmë reformën? Sigurisht që jam i gatshëm. Atëherë marrëveshja riaktivizohet? Mos bëj diversione. Reforma zgjedhore është prioritet i PDsë. Për këtë arsye ne do të nisim paralelisht me procesin e reformimit të PD- së punën për këtë reformë. Unë mund të ulem të bëj marrëveshje edhe me pasardhësin e Edi Ramës, se jam 10 vjet më i ri. Problemi është se si të shkojmë te një sistem që nuk shitet dhe blihet vota e qytetarëve. Do t’i hyjmë shumë shpejt një procesi me propozimet tona, ku do të përpiqemi të afrojmë sa më shumë shqiptarë. Fokusi im personal dhe i PD- së është të bashkojmë shqiptarët për zgjedhjet e lira dhe të ndershme. Çfarë qëndrimi do të adoptojë PS- ja dhe Edi Rama në këto rrethana përcaktohet nga shumë faktorë. Një faktor përcaktues është se sa imponuese do të jetë aleanca jonë e vlerave. Varet sa të aftë do të jemi të bashkohemi, jo vetëm PD, por edhe të tjerë. Në këtë moment që flasim unë nuk kam asnjë shpresë, sepse jo rastësisht por si produkt i përdorimit të krimit nga ana e Edi Ramës në 2013 dhe 2017, ai është në pushtet. Absolutisht ai do të bëjë çdo investim që të qëndrojë.
A do të bëni një pakt të sinqertë me ata që janë larg nga ju, ndoshta nesër janë edhe larg PD- së. E kam fjalën për Bregun, Topallin, Patozin. Keni ju forcë dhe energji të bëni një pakt në emër të PD- së? A rrezikon PD- ja të krijojë një çarje, që këta eksponentë të krijojnë një forcë të re?
Që Partisë Demokratike t’i bësh shantazh me përçarje, kjo nuk ka funksionuar në 27 vite. Nuk ka funksionuar me Sali Berishën dhe nuk do të funksionojë as me Lulzim Bashën. Jo për shkak të personalitet të njërit apo tjetrit, por për shkak të shpirtit të militantëve të PD- së, të cilëve PD dhe unë u detyrohemi gjithçka. Unë kam marrë një vendim individual për listën, dhe unë jam i vetëdijshëm për këtë. Kjo do të thotë edhe përgjegjësi individuale më e lartë, nëse vendimi do të ishte marrë sipas linjës statusore. Për këtë arsye është detyra ime të kem një mirëkuptim dhe tolerancë më të madhe individuale ndaj shprehjeve edhe emocionale të atyre që e kanë parë veten jashtë liste. Në këtë proces që po nis, do të ketë vend për secilin dhe secilën, nga demokrati më i thjeshtë deri tek ata që në PD për 5, 10, 20 vjet kanë qenë deputetë, ministra, që të japin kontributin e tyre. Kjo nuk do të varet fare nga raporti i humorit që ata kanë pasur me Lulzim Bashën apo që pasqyrohet anasjelltas. Vija e kuqe për mua është interesi i PD- së. Nëse cenohet interesi i PDsë, nëse sulmohet PD, që janë militantët, shpirti i saj, atëherë është detyra ime dhe bindja ime për të reaguar në mënyrën më të prerë. Për gjithçka tjetër, siç e thashë, vetëm rrethanat që më detyruan të hartoj një listë personale, më diktojnë mua të jem sa më i mirëkuptueshëm për të bashkuar të gjithë demokratët. Përfshirë edhe ata që nuk e duan Lulzim Bashën, që nuk e pëlqejnë Lulzim Bashën, por duhet të duan PD- në deri në fund.
Vlerësimi im për çështjen e marrëveshjes është ky: unë kam një qëndrim ndryshe nga z. Berisha për marrëveshjen e 18 majit. Z. Berisha e cilësoi atë marrëveshje si një fitore të shkëlqyer. Për mua marrëveshja erdhi në kushtet e një detyrimi absolut.. Marrëveshja politike e 18 majit, që erdhi pas ndërhyrjes amerikane, absolutisht nuk ishte objektivi im politik.