Emërimet në PS, Tahiri koordinator me qytetarët
Rama: Marrëveshje mirëkuptimi mes ministrave, PS e Grupit
Saimir Tahiri do të jetë koordinatori kombëtar i Partisë Socialiste për bashkëqeverisjen me qytetarët.
Kryeministri Rama e cilësoi shumë të rëndësishëm këtë koalicion me qytetarët, të cilët sipas tij do të luajnë edhe rolin e deputetit. Gjatë fjalës së tij në Grupin Parlamentar socialist, Rama tha se vendimet e Kryesisë vijnë si reflektim ndaj dëgjesave të bëra në korrik me qytetarët.
“Nga dëgjesat me qytetarët ne mësuam se ata kërkojnë nga ne pastrimshërbim-ndëshkim; kërkojnë pastrim të të gjithë mekanizmit të shtetit nga parazitët dhe grabitqarët. Njerëzit duan shërbim, për çdo nevojë dhe mbi çdo të drejtë që atyre ua jep ligji, njerëzit duan ndëshkim ndaj të gjithë atyre që u mohojnë të drejtat që ua jep ligji dhe Kushtetuta. Këto tri gjëra ne mund t’i realizojmë përmes bashkëqeverisjes me qytetarët, përmes përfshirjes së tyre realisht në qeverisje, përmes dhënies së atributeve të përfaqësuesve të koalicionit. Qytetarët do të kenë të drejtë të thërrasin në interpelancë ministrat dhe Kryeministrin me një numër të caktuar firmash”, tha Rama.
Kryesia e Partisë Socialiste vendosi dje Vasilika Hysin nënkryetare të Kuvendit, ndërsa caktoi dhe katër nënkryetarët e Grupit Parlamentar. Kryeministri Rama tha se ministrat do të firmosin marrëveshjen e mirëkuptimit me Sekretarin e Përgjithshëm të PS- së dhe kryetarin e Grupit Parlamentar. “Marrëveshja e mirëkuptimit mes kryetarit të Grupit Parlamentar të PS, sekretarit të përgjithshëm dhe ministrit, që do të thotë të gjithë anëtarëve të kabinetit qeveritar. Marrëveshja sanksionon rregullat e bashkëpunimit dhe ndërveprimit mes qeverisë, Grupit Parlamentar dhe partisë, si tri pjesë të pandashme të të njëjtit ekip qeverisës. Marrëveshja na jep fuqi komunikuese me publikun si asnjëherë më parë”, tha Rama. Për kreun e qeverisë, kryetarët e komisioneve parlamentare do të jenë dhe zëdhënësit e deputetëve në qeveri. “Kryetarët e zgjedhur sot të komisioneve tona, si pjesë e ekip- it qeverisës, janë njëkohësisht edhe zëdhënësit tuaj pranë qeverisë për çdo aspekt e problem, përveç mekanizmave që do të përcaktojë marrëveshja e komunikimit të drejtpërdrejtë të çdo deputeti me ekipin qeveritar” tha Rama, duke u hequr në këtë mënyrë çdo komunikim direkt të deputetëve me ministrat.