Pranga policit, dyshohet se dekonspiroi operacionet

Kavajë, u përgjua duke folur me të kërkuarin për vjedhje

Një efektiv i repartit "Shqiponja" të Policisë së Tiranës është arrestuar nga Shërbimi i Çështjeve të Brendshme dhe Ankesat, pasi dyshohet se ka dekonspiruar një operacion policor.

I arrestuari është Engrid Hënaj, me gradën inspektor, ndaj të cilit Gjykata e Kavajës kishte vendosur masën e sigurisë "arrest me burg", e cila u ekzekutua mbrëmjen e së mërkurës nga SHÇBA. Hënaj u arrestua me akuzën e "shpërdorimit të detyrës" dhe "përkrahjes së autorit të krimit". Sipas burimeve zyrtare nga Ministria e Brendshme, mësohet se nga hetimi ka rezultuar se ky punonjës Policie, në disa raste ka bashkëpunuar me shtetasin Fation Lila, i arrestuar për veprën penale të "vjedhjes në bashkëpunim më shumë se një herë". "SHÇBA ka siguruar prova se kundrejt marrjes së shumave të ndryshme të parave dhe favoreve të tjera, punonjësi i policisë, në shumë raste i jepte informacione mbi veprimet policore që kryheshin, shtetasit të mësipërm dhe personave të tjerë të implikuar në veprimtari kriminale", thuhet në njoftimin zyrtar të Ministrisë së Brendshme.

HETIMI

Gjykata e Kavajës vendosi masën e sigurisë "arrest me burg" për efektivin e "Shqiponjave" Engrid Hënaj, me kërkesë të Prokurorisë së Kavajës. Sipas kërkesës së organit të akuzës, Hënaj, me detyrë trupë shërbi- mi në repartin "Shqiponja", në Tiranë, ishte person i dyshuar për shpërdorim detyre. Në bazë të veprimeve procedurale të kryera nga Prokuroria e Kavajës, në vijim të informacionit të dërguar nga Shërbimi për Çështje të Brendshme dhe Ankesa, ka rezultuar se ky efektiv policie ka përkrahur dhe ndihmuar shtetasin Fation Lila, të dyshuar për vjedhje. Prokuroria e Kavajës ka pasur person nën hetim shtetasin Fation Lila, i dyshuar për vjedhje në bashkëpunim, me pasoja të rënda. Ai dyshohej se në bashkëpunim me persona të tjerë, kanë vjedhur tri automjete në një kompleks magazinash në Kavajë. Ndaj tij, me kërkesë të Prokurorisë së Kavajës, Gjykata caktoi masën e sigurisë "arrest me burg", vendim i cili për disa kohë nuk u bë e mundur të ekzekutohej, pasi ai fshihej. Gjatë kohës që ka qenë në kërkim, Fation Lila komunikonte shpesh me një punonjës policie, i cili më pas rezultoi se ishte shtetasi Engrid Hënaj. Ky i fundit e informonte të kërkuarin që në fazat e para të hetimit për vjedhjen, pra që në momentin kur ndaj tij ende nuk kishte dalë masa e sigurimit. Në komunikimet telefonike ndërmjet tyre, punonjësi i Policisë ishte i pari që e informoi se emri i Fation Lilës ishte ndër të dyshuarit kryesorë për vjedhjen e automjeteve. Gjithashtu, punonjësi i Policisë e informoi që ndaj tij kishte dalë masa e sigurisë "arrest me burg".