Prodhonin pasaporta false, arrestohen dy të dyshuar
TIRANE - Dy persona janë arrestuar dhe një tjetër është shpallur në kërkim nga Policia e kryeqytetit, pasi dyshohet se prodhonin letërnjoftime e pasaporta të falsifikuara, kryesisht italiane. Gjatë operacionit të koduar "Permeso", oficerët e Antikrimit Ekonomik kanë arritur të zbulojnë "laboratorin" e prodhimit të dokumenteve false, që ishte përshtatur në banesën e njërit prej të arrestuarve. Operacioni u krye në bashkëpunim me Prokurorinë e Tiranës, pas hetimit me metoda speciale, në bazë të të cilit u arrit identifikimi dhe arrestimi i të dyshuarve. Burime zyrtare të Policisë thanë se të arrestuarit janë Gëzim Tafaj, 48 vjeç, banues në Tiranë, i dënuar më parë për "Dhënie ndihme për kalim të paligjshëm të kufirit", dhe Kujtim Osmanaj, 51 vjeç, banues në Tiranë. Mësohet se arrestimi i këtyre personave është kryer pasi në saje të një hetimi disamujor, me metoda speciale në bashkëpunim me Prokurorinë e Tiranës është dokumentuar me prova ligjore veprimtaria e jashtëligjshme që ata ushtronin. Të njëjtat burime thanë se gjatë kontrollit të ushtruar në rrugën "Zef Kolombo", në mjetin tip "Mercedes Benz", me drejtues shtetasin Gëzim Tafaj dhe pasagjer shtetasin Kujtim Osmanaj, janë gjetur letërnjoftime të dyshuara të falsifikuara. Në vijimësi është ushtruar kontroll në banesën e shtetasit Gëzim Tafaj, ku përsëri janë gjendur letërnjoftime të tilla. Policia tha se është bërë shpallja në kërkim e shtetasit me iniciale O. S., si bashkëpunëtor i dy të arrestuarve. Policia tha dje se gjatë kontrollit të ushtruar në banesë dhe në makinë janë sekuestruar: 2 njësi kompjuteri, një laptop, solucione dhe kimikate të ndryshme, 2 pasaporta italiane, 2 pasaporta shqiptare, 1 kartë shëndeti italiane, 18 fotografi për dokumente të ndryshme, 1 pajisje e plastifikimit të doku- menteve, dokumente të ndryshme në llojin e porosive, letër me element sigurie për bërjen e dokumenteve të falsifikuara, 2 karta identiteti italiane të plotësuara, 10 karta identiteti italiane të paplotësuara, 3 karta identiteti shqiptare të plotësuara, 2 master card, 2 karta plastike ( me mbishkrim Oyster dhe Vantaggi), një pasaportë me emër shtetasi shqiptar e lëshuar më datë 24 shkurt 2011, automjeti tip "Mercedes Benz" dhe 4 celularë.