Haradinaj "mbron" ministrin serb
Kryeministri i Kosovës, Ramush Haradinaj, ka reaguar pas deklaratave të disa qytetarëve se ministri i ri i Bujqësisë në kabinetin e tij, Nenad Rikallo, i armatosur, ka terrorizuar qytetarët e lagjes "Dardania" gjatë luftës në Kosovë. Haradinaj tha se në bazë të përgjigjeve që ka marrë nga mekanizmat e shtetit, i ka rezultuar se Rikallo nuk ka qenë i përfshirë në veprime të tilla. "I kemi marrë me shqetësim reagimet e disa qytetarëve në lidhje me mundësinë e përfshirjes së një anëtari të kabinetit, ministrit Nenad Rikallo, në, siç pretendohet, keqtrajtimin e qytetarëve të Prishtinës gjatë periudhës së vitit 1999. Si Kryeministër i vendit dua t'i siguroj qytetarët e Kosovës se jo vetëm në këtë rast, por edhe në çfarëdo situate të ngjashme, do të veproj sipas ligjit dhe përgjegjësive që kam", thuhet nga zyra e Kryeministrit. Haradinaj tha se ka kërkuar informata nga Prokuroria e Shtetit, AKI dhe Policia e Kosovës lidhur me pretendimet e qytetarëve për përfshirjen e tij në aktivitetet e përmendura më sipër dhe në rrugë zyrtare nuk rezulton se ai ka qenë i përfshirë në veprime të tilla.