Atalanta e Berishës i jep leksion Evertonit të Runit

Atalanta e ka festuar me një fitore të madhe 3- 0 kthimin në Europë pas plot 26 vitesh. Bergamezët kanë mposhtur bindshëm anglezët e Evertonit në ndeshjen e parë të Grupit E në Ligën e Europës. Masielo kaloi vendësit në avantazh në minutën e 27- të, ndërkohë që Gomez dyfishoi rezultatin në minutën e 41- të. Në të 44' Kristante shënoi edhe golin e tretë, duke vulosur shifrat përfundimtare që në pjesën e parë. Portieri shqiptar, Etrit Berisha, arriti ta ruante portën e paprekur deri në fund. Në ndeshjen tjetër të këtij grupi, Apollon Limasoli barazoi 1- 1 me Lionin.

Lacio - Dy asiste në minutat 33 dhe 57 kanë bërë që Milot Rashica t'i japë një dorë të rëndësishme skuadrës në "flirtin" me fitoren përballë skuadrës së Lacios. Viteshe kaloi në avantazh në pjesën e parë me anë të Matavz, ku futbollisti i Kosovës ishte personi që "gatoi" golin. Një gol i Parolos në të 51- n baraspeshon, por është sërish Rashica që asiston dhe Viteshe gjen avantazhin me anë të Linsen në të 57- n. Bardhekaltrit e Strakoshës nuk janë dorëzuar. Trajneri Inzagi ka bërë tri zëvendësime në pjesën e dytë që kanë ndryshuar gjithçka. Imobile, Milinkoviç-Saviç dhe Luliç kanë bërë që ital- ianët të përmbysin rezultatin në Holandë. Skuadra e Berishës ka barazuar në të 67- n me Imobile dhe më pas ka qenë Murxha që ka realizuar golin e triumfit në të 75'.

Në takimet e tjera, Basaksehir, ish- skuadra e Sokol Cikalleshit, ka barazuar pa gola në shtëpi përballë skuadrës së Ludogortets, duke zhgënjyer jo pak. Hofenhaim është mundur në Gjermani 1- 2 nga Braga, ndërkohë që Vijareali ka mposhtur në shtëpi 3- 1 Astanën, ekipi kazakistan, që mban pronësinë e kartonit të Asdren Llullakut. Real Sociedad ka likuiduar 4- 0 skuadrën e Rozenborgut në shtëpi, ndërsa Marseja ka fituar me rezultat të ngushtë 1- 0, përballë Koniasporit.