Shembja e kullës së Prek Calit, Tom Doshi: Do e bëj unë 3- katëshe
Rama distancohet nga ndërhyrja, reagon deputeti “aleat”: “Urrejtja ndaj qëndrestarëve antikomunista nuk ka fund”
Prishja e kullës historike të Prek Calit, njeriut që organizoi protestat e para antikomuniste në Shqipëri në 1945- n, është bërë objekt i një debati politik.
Ishin fillimisht banorët e zonës së Vermoshit në Shkodër, të cilët denoncuan përmes fotove prishjen e kullës së Prek Calit dhe më pas organizuan një protestë lidhur me këtë ngjarje. Banorët akuzuan Bashkinë e Malësisë së Madhe se përmes Inspektoratit Ndërtimor të këtij institucioni u prish shtëpia e heroit të Shkodrës, Prek Cali. Sipas banorëve, prishja nga ana e Bashkisë e objektit erdhi për shkak se pretendohej se ndërtimi ishte pa leje, ndërkohë që për rindërtimin e kullës investimi ishte bërë nga shqiptarët e diasporës në Amerikë. Ngjarja mori përmasat e një debati publik, kur kreu i opozitës, Lulzim Basha, e cilësoi prishjen e kullës së Prek Calit si një hakmarrje të Edi Ramës për prijësin e lëvizjes antikomuniste në Veri. Për kreun e opozitës, kur kthen pinjollët e Byrosë dhe xhelatët e diktaturës në krye të vendit, të tremb kujtimi dhe hija e Prek Calit.
REAGIMI Pas reagimeve të shumta në lidhje me prishjen e kullës së Prek Calit, ka reaguar edhe kreu i qeverisë, Edi Rama. Përmes një postimi në Facebook, Rama e ka cilësuar sajesë të opozitës akuzën se ka qenë qeveria urdhëruese e prishjes së kullës së Prek Calit. Kreu i qeverisë ka deklaruar se opozita vijon të jetë bosh dhe e shkretë, duke sharë dhe sajuar pa fund në drejtim të qeverisë. “Unë prishësi i kullës së Prekë Calit? Bosh se bosh u mbeti koka, o të shkretë, që veç shani për çka sajoni vetë, s’ka derman për ju, vajmedet”, ka reaguar në formë poetike, Kryeministri Rama.
POLEMIKA Pavarësisht se deklaroi që do të mbështesë me votë qeverinë dhe Kryeministrin Rama, Tom Doshi, deputeti i PSD- së në Parlament, reagoi ashpër lidhur me prishjen e kullës së Prek Calit. Tom Doshi e cilëson aktin barbar dhe turpërues për ata që morën votën e malësorëve dhe tregojnë urrejtje për antikomunistë si Prek Cali. “Janë prish punimet që kishin fillu për rindërtimin e shpisë së Prek Calit në Vermosh... Në veçanti më vjen keq për mundin e komunitetit shqiptar të Amerikës që kontribun financiarisht për punimet që ishin ba deri dje dhe i kërkoj falje në emën të tan shqiptarëve. Pikërisht, ata që do të duhej ta kishin mbrojt shtëpinë e prijësit dhe të mbrojtësit të tokave shqiptare, heroit Prek Cali, e rrafshuen edhe atë që kishte mbetë në kambë. Ky akt barbar turpnon ata që i kanë marrë votat malsorëve dhe tregon se urrejtja ndaj qëndrestarëve antikomunista si Prek Cali nuk ka fund”, deklaron Doshi. Deputeti i Sh- kodrës u ka premtuar mbështetësve dhe bashkëqytetarëve të tij se shtëpia e Prek Calit do të ndërtohet ashtu siç ka qenë dikur. “Kurrkush nuk mund ta mposhtë kujtimin e atij burri të kombit. Unë vetë si kushëri i tij, si deputet dhe si qytetar, ju jap fjalën që shtëpia e Prek Calit do të ndërtohet trekatëshe për Vitin e Skënderbeut”, shprehet Doshi. Por ky reagim i Doshit është komentuar nga nënkryetari i PD- së, Edi Paloka, i cili ka kujtuar se pasi i votoi për pinjollët e komunistëve në qeveri, nuk ka përse çuditet përse ata urrejnë antikomunistët. “Toma, pasi u zgjodh deputet me siglën e Gjinushit, pasi votoi për Kryeministër të birin e Kristaqit dhe nipin e Spiro Kolekës, pasi votoi për Ruçin dhe Xhafajn, pasi votoi pinjollët e Sul Bushatit e Llambi Gegpriftit... papritur “zbuloi” se këta i urrekan antikomunistët, kur prishën kullën e Prek Calit”, ka deklaruar Paloka.