Duma: Gjykimi për Bashën nis tani, më parë nuk ishte deputet në Kuvend
Kritikat në mbledhjen e Grupit, deputetja: Qartësim nga perspektiva e Berishës, as e komentoj e as e kam komentuar
Deputetja dhe zëdhënësja e Grupit Parlamentar demokrat, Grida Duma, beson se tani ka filluar momenti i gjykimit për kreun e PD- së, Lulzim Basha.
Në një intervistë për emisionin “Kjo Javë” të Nisida Tufës, Duma sqaron debatet në Grupin Parlamentar dhe përfaqësimin që lista e hartuar nga Basha u bëri demokratëve.
U votua z. Ruçi në krye të Parlamentit dhe me dy vota nga PD. U quajt vjedhje në media, ndërkohë nga ju u quajt manipulim. Si e cilësoni atë që ndodhi?
Unë nuk besoj që në termin manipulim nuk është e përfshirë çdo gjë që vjen pas asaj që është rrjedhje, vjedhje, blerje edhe çdo gjë tjetër. Manipulim mbetet. Një grupim politik ka qëndrimin e vet dhe sa kohë që qëndrimi në unanimitet dhe në mënyrë të hapur është deklaruar kundër dhe askush nuk ka thënë një qëndrim të ndryshëm, kur rezultati matematikor është i ndryshëm, atëherë natyrshëm termi i parë është manipulim. Besoj që është njëlloj maturie që të mos dalësh në gjykime të menjëhershme, nëse ka qenë rrjedhje, tradhti apo diçka tjetër. Për një gjë që përballesh në momentin e parë me diçka që nuk ishte e duhur, manipulim besoj se ishte termi i duhur.
Jeni njohur me deklaratat e z. Berisha në lidhje me qëndrimet që duhet të mbani si deputete dhe si zëdhënëse e Grupit?
Nuk duhet t’i japim kësaj çështjeje natyrën e gjyqit, siç po tentoni ju t’i jepni. Po, është një qartësim i thënë nga perspektiva dhe qëndrimi i z. Berisha, të cilin unë as e komentoj dhe as e kam komentuar në asnjë rast. Për mua debati i brendshëm duhet të ngelet i brendshëm. Nëse do të ishte vlerësuar çdo debat i brendshëm që të jetë i hapur publikisht, ai duhet të jetë nga A- ja deri te ZH- ja. Këtë debat e quaj në mënyrë fare etike që të jetë i brendshëm në Grupin Parlamentar.
Berisha i ka cilësuar këshilltarët e z. Basha “mizerabël”. Keni ju një koment për këtë?
Absolutisht jo. Nuk kam asnjë koment për asnjërin nga kolegët, nga anëtarët, kontribuuesit e PD- së. Duhet ta keni vënë re që nuk kam pasur asnjëherë një përfshirje as në debatin e brendshëm të PD- së, e cila kaloi faza të rëndësishme të saj dhe reflektimi të rëndësishëm. Nuk jam përfshirë asnjëherë në të tilla debate.
Jeni cilësuar si nga të preferuarit e z. Basha. Si e vlerësoni figurën e tij?
Nuk kam asnjë ide nga lind ky cilësim. Unë besoj që në politikë askush nuk ka dhe nuk mund të ketë luksin të ketë të preferuar. Të preferu- ar? Kurrsesi. Të nevojshëm, bashkëpunëtorë, kolegë, njerëz që duan të kontribuojnë, besoj që do të ketë gjithmonë. Politika nuk ka luksin të japë sinjale preferencash. Sa i përket qëndrimit tim ndaj kreut të PD- së, mendoj që ky është momenti apo fillimi në të cilin ka filluar ajo që quhet ora e vlerësimit dhe gjykimit të tij. Deri në momentin që ai nuk ndodhej në sallën e Kuvendit dhe nuk ishte deputet, dhe një pjesë e madhe e betejës parlamentare mungonte nga kryetari i opozitës, besoj që kishim arsye për të thënë që gjykimi nuk duhet të fillonte në atë moment. Gjykimi për të nis tani, siç edhe për gjithë të tjerët që jemi aty. Është ende për t’u provuar, apo sa ka nisur prova për të cilën tashmë gjykimi për gjithçka do të jetë legjitim.
Nuk kemi pasur një reagim tuajin në lidhje me listën e z. Basha, përfshirë këtu edhe qëndrimet e z. Berisha?
Unë mendoj që lista në të tërën e saj ka përfaqësim. Duke nisur nga individët me eksperiencë dhe kontribute, ka përfaqim sa i takon asaj që mund të quajmë meritokraci dhe ka një risi të njerëzve që kanë ardhur nga profesionet e tyre dhe sot janë në poltronën e përgjegjshme të deputetit. Sigurisht që vijoj të mendoj që shoqëria, ashtu siç e do të renë, duhet edhe ta mirëpresë atë dhe të mos e gjykojë me filtrat negativë që në momentin e parë.