Patozi: Basha duhet të pranojë fraksionet, në PD, nuk kthehen gjeneralët si ushtarë

Ish- deputeti i PD-së, Astrit Patozi, sheh si të vetmen rrugë për ringritjen e Partisë Demokratike përfshirjen e kundërshtarëve të Lulzim Bashës në parti. Në një intervistë për emisionin “Oktapod”, Patozi ka deklaruar se e neverit mënyrën se si Basha u zgjodh në krye të PD- së, por e njeh atë si kryetar, duke i kërkuar këtij të fundit që të njohë fraksionin brenda në parti. “Pavarësisht se unë e kontestoj dhe e neveris mënyrën se si ai u zgjodh, jam i detyruar ta pranoj si kryetar, pasi unë jam legjitimist. Megjithëse unë e refuzoj mënyrën se si ai u zgjodh, i kam thënë gjërat e mia të gjitha dhe, tek e fundit, jam i detyruar ta pranoj si kryetar në rast se ai do të pranojë ekzistencën e një alternative tjetër, e cila është shumë e fuqishme në PD. Pa diskutim që ka një fraksion brenda Partisë Demokratike, por ky duhet të jetë i përfaqësuar, sepse ndryshe nuk ka asnjë vlerë. Nuk ka ndodhur asnjëherë në botë që gjeneralët të kthehen në ushtri si ushtarë. Lulzim Basha ka vetëm një mënyrë, duhet ta njohë dhe t’i japë mundësi kësaj pjese të lënduar, le të themi, brenda PD- së të përfaqësohet. Sepse, siç e pranoi dhe vetë dhe siç e tha zoti Berisha, është e papërfaqësuar. Grupi Parlamentar është lista “Basha”, lista Basha nuk është Parti Demokratike. Që ta bëjë Parti Demokratike, duhet ta ndryshojë, nuk e ndryshon në Parlament, le të gjejë mënyrën”, deklaroi Patozi. Ish- nënkryetari i PD- së e cilëson sjelljen e Bashës në krye të PD- së me hartimin e listave dhe rizgjedhjen në krye të partisë si një krim politik. Patozi deklaron se nuk mund të ketë amnisti për atë që Lulzim Basha bëri me PD-në, duke kujtuar se askush prej eksponentëve nuk ka marrë asnjë ndjesë. “Nëse përgjegjësia e zotit Basha është e tillë, siç unë dhe shumë kolegë apo demokratë pretendojmë që është përgjegjësi e plotë dhe personale për gjithçka që ndodhi me zgjedhjet e 25 qershorit dhe pas tyre, atëherë sipas meje ky është një krim politik. Është krim politik ndaj PD- së. Nuk mund të ketë amnisti kaq të thjeshtë për këtë, aq më tepër kur nuk ka as kërkim ndjese. Gjithashtu nuk mund të ketë ndjesë pasi ke bërë vrasje dhe të thuash që unë do të dënohem për gjobë”, shtoi ish- deputeti i PD- së. Patozi deklaroi se nuk ka asnjë keqardhje për mungesën e tij në Grupin Parlamentar të Partisë Demokratike, sidomos kur pa mënyrën se si ata u përfaqësuan në seancën e Parlamentit. “Kur e mësova në fillim që nuk isha në listën e Partisë Demokratike, që tani është lista ‘ Basha’, sigurisht që kisha njëlloj keqardhjeje, sepse mendoja se isha ende i zoti për të qëndruar në fushë. Por me kalimin e kohës dhe me atë prezantimin e parë të grupit të opozitës dhe Grupit Parlamentar, jam ndier shumë i çliruar që nuk isha pjesë as e asaj mbledhjeje që u bë pas rrjedhjes së votave dhe në përgjithësi jam ndier i çliruar”, tha Patozi. I pyetur nëse do të krijojë një forcë të re politike, nëse lëvizja brenda PD- së do të dështojë, Patozi deklaroi se gjëja më e thjeshtë është krijimi i një partie, por nuk është në planet e tij të afërta. “Gjeja më e lehtë që mund të bëjë një politikan apo një grup politikanësh me eksperiencë është që të krijojnë një formacion tjetër, sepse shpëton nga gjithçka dhe fillon një gjë nga e para; eksperiencën e ka, 5 njerëz që i besojnë i ka, e kështu me radhë. Kjo është e fundit gjë, që mua personalisht më shkon në mend, por kam përshtypjen edhe shumicës së kolegëve me të cilët unë kam komunikim të përditshëm. Jo nuk është, nuk është. Sigurisht unë nuk mund të them asnjëherë kurrë, se nuk thuhet në politikë”, sqaroi Patozi.