Qeveria, nisin ndryshimet në administratë

Lëvizjet e sekretarëve të përgjithshëm sipas ministrive

Ministrat e rinj të qeverisë “Rama 2”, menjëherë pas betimit në Presidencë, kanë nisur nga puna për të plotësuar strukturën në institucionet e tyre. Në 11 ministritë e qeverisë janë përcaktuar Sekretarët e Përgjithshëm. Një pjesë e sekretarëve, të cilët u shkarkuan pas emërimit të ministrave teknikë pas paktit Rama- Basha, janë rikthyer sërish në detyrë, por jo në të njëjtat dikastere. Plarent Ndreca, ish- sekretari i Përgjithshëm i Ministrisë së Arsimit, i cili pati edhe një përplasje publike me ministren teknike të Arsimit, Mirela Karabina, është rikthyer sërish në detyrë. Por pavarësisht rikonfirmimit të Lindita Nikollës në krye të Ministrisë së Arsimit, Ndreca do të jetë Sekretar i Përgjithshëm i Ministrisë së Mjedisit dhe Turizmit të drejtuar nga Blendi Klosi. Sekretar i Përgjithshëm në Ministrinë e Arsimit, Rinisë dhe Sporteve do të jetë, Koli Bele. Gjatë mandatit të parë të qeverisë Rama, Koli Bele ishte sekretari i Përgjithshëm i Ministrisë së Energjetikës të drejtuar nga Damian Gjiknuri. Gentian Keri do të jetë sekretar i Përgjithshëm në Ministrinë e Infrastrukturës dhe Energjisë, që do të drejtohet nga Damian Gjiknuri. Gazmend Barbullushi do të vijojë të jetë sekretar i Ministrisë së Jashtme, e cila pas riformatimit të qeverisë, do të quhet Ministria për Europën dhe Punët e Jashtme. Në ministrinë e Financave dhe Ekonomisë do të vijojë të jetë Sekretare e Përgjithshme, Gelardina Prodani. Të njëjtën detyrë si në mandatin e parë, do të mbajë edhe Elira Kokona, e cila do të vijojë të jetë Sekretare e Përgjithshme e Ministrisë së Kulturës dhe Kledia Ngjela në Ministrinë e Shëndetësisë dhe Mbrojtjes Sociale. Sekretar i Përgjithshëm në Ministrinë e Mbrojtjes të drejtuar nga Olta Xhaçka do të jetë Alba Thoma, ndërkohë Dritan Palnikaj do të mbajë të njëjtin post në Ministrinë e Punëve të Brendshme të Fatmir Xhafës. Ministri i Bujqësisë dhe Zhvillimit Rural, Niko Peleshi, ka emëruar si sekretar të Përgjithshëm Aurora Alimadhin, ndërsa ministrja e Drejtësisë, Etilda Gjonaj, në të njëjtin post në institucionin e saj, ka emëruar Oltjon Muzakën. Më interes pritet emërimi i zv. kryemi- nistrave të qeverisë. Sipas kryeministrit Rama, është shumë e rëndësishme që çdo ministri të ketë një ekip të fortë ku zv. ministri të jetë në nivelin e ministrit dhe të mbulojë një fushë të caktuar në dikasteret që kanë marrë kompetenca të reja.