Tirana e nis me fitore, tifozët kthehen me protesta
Ultrasit kundër presidentit, akuza, ironi e thirrje ofenduese
Tirana e ka mbyllur me fitore ndeshjen e saj të parë historike në Kategorinë e Parë.
Në stadiumin "Selman Stërmasi" ku nuk mungonin tifozët bardheblu, ekipi i drejtuar nga Ze Maria ka fituar me shifrat 1- 0 ndaj Ilirisë. Megjithatë, skuadra kryeqytetase nuk ishte aq dominuese sa pritej, duke llogaritur pretendimet e saj, ndërsa vazhdoi të shfaqte problemet e zakonshme në finalizimin e aksioneve sulmuese. Sentamu dhe Greca krijuan disa raste për shënim në pjesën e parë, por pa arritur ta dërgonin topin në rrjetë. Ze Maria hodhi të gjithë skuadrën në sulm, pasi aktivizoi edhe Ngoo me Qilimin që në fillimin e pjesës së dytë, por përsëri ekipi e kishte të vështirë të shënonte, ndonëse kishte zotërimin thuajse të plotë të topit. Për të shmangur një barazim të bujshëm mendoi Maveje, i cili në minutën e 80të, me një gjuajtje perfekte nga
jashtë zonës, dërgoi topin në rrjetë për t'i dhënë suksesin minimal 1- 0 skuadrës së tij në këtë ndeshje debutuese në rrugëtimin në Kategorinë e Parë.
Tifozët - Grupimi "Tirona Fanatics" është kthyer dje në tribunat e stadiumit "Selman Stërmasi", por me sa duket nuk do të ndalin së kontestuari presidentin Refik Halili. Kjo u pa qartësisht që në minutat e para të ndeshjes kundër Ilirisë, ku mbështetësit e Tiranës shpalosën që në fillim një parullë të madhe kundër tij. "Koha jote mbaroi" ishte parulla që ka qëndruar gjatë gjithë ndeshjes në tribunën ku pozicionohen "Tirona Fanatics". "Histori e deformuar, president i dështuar", ishte mesazhi. "Mbi Tiron, për ne veç Zoti. Faji s'ngeli jetim, ai është i joti", ishte një tjetër parullë që u shpalos në tribunë. Më pas është shpalosur një tjetër parullë thumbuese në adresë të presidentit të bardhebluve, duke ironizuar me të. "Këngëtar- stonon, ndërtues- mashtron, president- dështon. Gjeje kush është?!", shkruhej në parullën që i kushtohej Halilit.