Aksidentet, 30 fëmijë viktima në 20 muaj

Policia: Ndodhën 366 ngjarje me përfshirjen e fëmijëve

TIRANE - Numri i lartë i aksidenteve rrugore ku përfshihen fëmijët, ka bërë që Policia Rrugore të vërë në zbatim një plan operacional, që ka si synim ndërgjegjësimin për vendosjen e rripit të sigurimit dhe sediljen e posaçme të fëmijëve. Sipas statistikave të Policisë Rrugore, në 20 muaj kanë ndodhur 366 aksidente automobilistike me përfshirjen e fëmijëve. Në këto ngjarje kanë humbur jetën 30 fëmijë, 64 janë plagosur rëndë dhe 272 janë plagosur lehtë. Policia tha dje se plani operacional “Tispol– Shtator 2017”, ka si qëllim rritjen e parametrave të sigurisë rrugore dhe ushtrimin e kontrolleve në respektimin e legjislacionit rrugor të drejtuesve të mjeteve. Kryesisht, në drejtim të përdorimit të rripave të sigurisë dhe sistemeve të fiksimit për fëmijët që transportohen në mjete. Ky plan është bërë në koordinim me shërbimet e Policive Rrugore të vendeve të BE- së, në kuadër të “Operacioneve Tispol”, të rekomanduara nëpërmjet Misionit “PAMECA V”, në Tiranë. Policia tha dje se oraret e kon- trolleve të përqendruara janë, nga ora 09: 00- 11: 00 dhe nga ora 17: 00- 20: 00. Shtrirja e tyre është në të gjitha akset rrugore dhe zonat urbane. Gjatë javës së kaluar, Policia Rrugore ka kryer mbi 18 mijë kontrolle, duke ndëshkuar me gjobë për mosvendosje të rripit të sigurimit, 2170 drejtues mjetesh, si dhe duke pezulluar 36 leje drejtimi të shoferëve që transportojnë në mënyrë të parregullt fëmijët. “Synimi i kontrol- lit është ndërgjegjësimi dhe edukimi i drejtuesve të mjeteve për të rritur shkallën e përdorimit të rripit të sigurimit dhe të sediljeve të posaçme për transportin e fëmijëve. Drejtues mjeti, prindër, vendosja e rripit të sigurimit shpëton jetën tuaj dhe të fëmijëve tuaj”, ishte mesazhi që shpërndau dje Policia e Shtetit. Ndërsa theksoi se, duke vendosur rripin, bëheni aleat të Policisë.