Spitalet pa drejtues, Ministria shpall konkursin dhe kriteret
Shkarkohen edhe drejtuesit e spitaleve universitare, vendet vakante
Drejtuesit e qendrave spitalore universitare ishin të vetmit që u shpëtuan kritikave publike dhe ultimatumit të Kryeministrit Rama për të dhënë dorëheqje.
Kur të gjithë të tjerët u akuzuan për paaftësi dhe iu numëruan “të zezat” një më një duke i bërë përgjegjës të drejtpërdrejtë për gjendjen në të cilën ndodhet aktualisht sistemi shëndetësor, drejtuesit e 5 klinikave universitare ishin të vetmit që ia hodhën paq. Kryeministri zgjodhi t’i përjashtonte, me argumentin se ata nuk kishin ndenjur “duarkryq” në 4 vitet e shkuara. Por kur nuk janë bërë ende dy muaj nga takimi, ministria i shpall si vende vakante.
UDHËZIMI Udhëzimi i parë i firmosur nga ministrja e Shëndetësisë dhe Mbrojtjes Sociale, Ogerta Manastirliu, është ai për hapjen e konkursit dhe shpall- jen e kritereve për emërimin e drejtuesve të rinj për 43 spitale. Në mesin e tyre janë rreshtuar edhe QSUT, Qendra Spitalore Universitare “Mbretëresha Geraldinë”, “Shefqet Ndroqi”, SUOGJ “Koço Gliozheni” dhe Spitali Universitar i Traumës. Titullarët e këtyre 5 institucioneve, që u duk se i kishin shpëtuar shkarkimit, po ashtu do të zëvendësohen.
KRITERET Përmes një shkrese të posaçme, ministrja Manastirliu ka përcaktuar procedurat e përzgjedhjes, emërimit dhe shkarkimit të drejtuesve të rinj. Kandidatët e interesuar do të duhet të dorëzojnë pranë Ministrisë së Shëndetësisë letër interesi, CV, dëshmi pe- naliteti dhe dy referenca rekomanduese. Dosja do të vlerësohet me 20 pikë, ndërsa peshën më të madhe do ta ketë testimi me gojë, që do të vlerësohet me 50 pikë përkundrejt 30 pikëve që do të vlerësohet ai me shkrim. “Kandidati për pozicionin ‘ Drejtor’ duhet të plotësojë kërkesat e mëposhtme: Të zotërojë diplomë të nivelit master shkencor, preferohet të ketë eksperiencë pune në drejtim ose menaxhim, të mos jetë marrë ndaj tij masë disiplinore gjatë tre viteve të fun- dit, si edhe të mos jetë dënuar me vendim të formës së prerë për kryerjen e një krimi apo për kryerjen e një kundravajtjeje penale”, thuhet më tej në udhëzim. Për aplikimet është caktuar një afat 15- ditor. Ministria e Shëndetësisë ka tagrin për shkarkimin e titullarit në rast se konstaton shkelje flagrante ose kur ka një vendim të formës së prerë nga gjykata për falsifikim dokumentesh, përvetësim fondesh, marrje ryshfeti dhe deklarim të rremë gjatë fazës së aplikimit.