Hamdi Jupe: Ka 14 ditë që nuk po merren pensionet, pse janë bllokuar

GAZETARI: PENSIONISTET PA LEKE, KUVENDI MERRET ME SAIMIRIN

Ka katërmbëdhjetë ditë që pensionistët nuk po marrin dot pensionet e tyre. Ata shkojnë te bankomatet e bankës, por atje nuk ka para për ta. Fillimisht, kjo ndodhi me pensionet suplementare, që historikisht shpërndaheshin më datën dhjetë të çdo muaji. Këta janë disa qindra, në mos disa mijëra pensionistë. Pasi kaluan nja katër ditë dhe pensionet nuk po dilnin, këta mësynë sportelet e Bankës së Kursimeve. Banka nuk kishte çfarë t'u thoshte, s'kishte para.

Më në fund, pas katër ditësh vonesë, ajo u dërgoi nga një mesazh ( SMS) pensionistëve. "Përshëndetje. ISSH ( kupto: Instituti i Sigurimeve Shoqërore- shënimi ynë) automatizon sistemin. Ju informojmë se pensioni suplementar do kalohet çdo datë 20, me pensionin e pleqërisë dhe shtesa të tjera. Credins Bank. 13.10.2019". ( Nuk merret vesh se për cilin muaj dhe cilin vit është kjo "datë 20").

Nuk dihet se përse njoftimin e Institutit të Sigurimeve Shoqërore ( institucion publik) e dërgon Banka ( institucion privat). A nuk ka gojë vetë Instituti të flasë publikisht, nëse ka vërtet gjë për të thënë për vonesën e pensioneve? Mblodhën mendjen ( edhe bishtin në shalë) pensionistët dhe ikën. Pritën të vijë data njëzet. Ja, edhe një javë është akoma, nuk do vdesim. Erdhi kjo datë, po prapë te bankomatet nuk ka para. As për pensionet suplementare, as për pensionet e zakonshme tanimë. Tani nuk janë më disa mijëra, tani janë rreth gjashtëqind e pesëmbëdhjetë mijë pensionistë, që presin të marrin paratë. Nuk është derdhur gjë në bankë. Është e premte, ditë pune, data 20 tetor 2017, por jo, s'ka para.

Pensionistët shkojnë prapë më datën 21, ditë e shtunë te bankomatet, por asgjë. Ata nuk kanë punë tjetër. Edhe më datë 22 tetor, asgjë në bankomate. Bankat janë pushim për fundjavë e nuk ka kush t'u dërgojë SMS pensionistëve, t'u thotë pse nuk kanë dalë pensionet në bankë më datën 20, siç u kishte thënë vetë Banka. Se ata e mbajnë mend mirë mesazhin e Bankës për datën 20. ISSH, jo se jo, se edhe ai është me pushime.

Pensionistët u bien me dorë bankomateve, domethënë: mos nuk janë këta në terezi? Po prapë, asgjë nuk del prej tyre. Ata largohen të zemëruar duke sharë. "Ah, uq … qeverinë edhe bankën bashkë!"- shajnë ata nëpër dhëmbë. Mirëpo, qeveria e di: ata as atë punë nuk e bëjnë dot më, se janë pensionistë, nuk kanë fuqi. Nuk kanë faj të zinjtë. Ato para që kishin vënë mënjanë nga korrupsioni dikur, kur ishin në punë, u kanë mbaruar tani.

Ata rrinë e mendojnë të trishtuar. Kur zhvillohen zgjedhjet, ata shkojnë të parët atje, te kutitë e votimit, pa u hapur akoma qendrat e votimit. Kanë votuar për qeverinë. Po qeveria është e zënë me punë. Me debatin për imunitetin e Saimirit. Shtatë orë debat në ditë. Me dyer të hapura e me dyer të mbyllura. Kënaqen pensionistët sepse e dëgjojnë "live" debatin në të gjitha televizionet. Edhe këto, televizionet, vetëm me debatin për Saimirin merren, ditë e natë, nuk kanë kohë të merren me pensionet. E lagu apo nuk e lagu Saimiri! Debati vazhdon maratonë. Eh, sa i mirë ky debati për Saimirin! Po ja që, na duhen edhe domatet, edhe preshi, edhe spinaqi, edhe kosi, edhe çaji, edhe buka masive, edhe dritat. ( More, si shumë pretendime paskan këta qerratenjtë pensionistë!)

Pensionistët rrinë e kujtohen: Një herë në gjashtë muaj, te banka atyre u kërkojnë "Deklaratën e gjallesës". Ç'është kjo deklaratë, do thoni ju? Është deklarata, që ti je gjallë e nuk ke vdekur. Ta kërkon banka, se ndryshe, s'ka pension. Se jeni shejtanë ju pensionistët, edhe vdisni, edhe vazhdoni të merrni pensionin te bankomati! Prandaj do bëni "Deklaratën e gjallesës" çdo gashtë muaj. S'ka hau- hiu këtu. Jemi qeveri e fortë ne, qeveri që e zë lepurin me qerre.

Në Shqipëri nuk ka ligj që të detyrojë njeriun ta deklarojë se është gjallë çdo gjashtë muaj. Po ligjin e bën banka, kuptohet, me lejen e qeverisë. E kërkon Instituti i Siguri- meve, thotë banka. Është detyrë e Institutit të Sigurimeve Shoqërore të bëjë verifikime, nëse ka abuzime me pensionet e atyre që kanë vdekur, se ka ndodhur edhe kështu. Po Instituti ia ka deleguar këtë të drejtë bankës ( private), ashtu siç i ka deleguar edhe të drejtën për të bërë deklarata në emër të tij.

Ja mesazhi origjinal, i dërguar nga Banka për pensionistët, në muajin shtator 2017: "Përshëndetje. Faleminderit që tërhiqni pensionin në Bankën Credins. Në shtator, ju duhet të plotësoni deklaratën për marrjen e pensionit në bankë. Ju mirëpresim." Me SMS ata thonë "deklaratën", po kur vete atje e pyet se ç'është kjo deklaratë, ta thonë copë: ' deklaratën e gjallesës', pra, që je gjallë e nuk ke vdekur. Hajde estradë pa pare, hajde. Dhe kjo estradë është çdo gjashtë muaj.

Firmosin pensionistët deklaratat që janë gjallë e nuk kanë vdekur, se ndryshe, s'ka pension. Mirëpo, për bela, ata dëgjojnë Kryeministrin në televizor ( se s'kanë punë tjetër të bëjnë ata, a e kupton ti apo jo!) që thotë se "nuk ka më letra e vërtetime e certifikata nëpër zyra. Letrat e vërtetimet janë në sistem, le të hapin sistemin elektronik të Gjendjes Civile ata të bankës e të Institutit të Sigurimeve e të shikojnë atje në je gjallë apo ke vdekur". Mos e ka thënë gjë në muajin shtator Kryeministri këtë? Pikërisht atëherë e ka thënë, kur dërgon mesazhin për "gjallesën" banka, në emër të Institutit, sigurisht. Po kujt i flet Kryeministri! Se mos varet nga qeveria Instituti i Sigurimeve! Jo, duhet "Deklarata" me shkrim, thotë banka dhe Instituti bashkë me të.

Nuk ka faj qeveria për vonesat e pensioneve. Tani për tani, nuk ka zgjedhje. Zgjedh- jet e reja, duan dy vjet të vijnë. Qeveria është duke u riorganizuar. U bashkuan dy ministri dhe dymbëdhjetë drejtori. Tani, atje po bëhet riorganizimi, riformatimi, rigjenerimi, rinovimi, ripastrimi etj. Nga punët e mëdha që kanë, ndoshta te Ministria e Financave, kanë harruar fare që ka pensionistë në Shqipëri. Prandaj ndodh kjo. Se, para ka sa të duash. Paratë janë me dengje në bankë. Pas dy vjetësh, kur të ketë prapë zgjedhje, nja njëzetë mijë nga këta gërxhot pensionistë do kenë ikur në atë botë, kështu që, s'ka problem, ata s'do votojnë më.

Gjendja ekonomike e vendit është e mirë. Ekonomia është rritur me katër për qind. Treguesit makro janë nën kontroll, eksportet po ecin, rritja e pensioneve është bërë para zgjedhjeve të qershorit. Gjendja në rajon është e qetë e stabël. Ka ca turbullira atje, në Spanjë, po ajo është larg, hë për hë. Atëherë, ç'kërkojnë tjetër këta pensionistët?

Një grup pensionistësh të vrerosur ( me bindje të djathta, kuptohet) marrin rrugën të shkojnë e të ankohen te SHQUP- i. Ka apo s'ka opozitë ky vend, xhanëm! Po atje nuk i pret njeri. "Jemi të zënë, - u thonë. - Mos na bini në qafë tani. Ju e shikoni që jemi duke u marrë me arrestimin e Saimir Tahirit. A nuk e kuptoni, që punojmë ditë e natë për këtë? Tani e gjetët kohën të ankoheni për pensionet? Prisni, të mbarojë kjo punë njëherë, pastaj e shikojmë edhe atë të pensioneve tuaja. Pret ajo. Ka prioritete e prioritete."

Ata, pensionistët, e kuptojnë, natyrisht, me vonesë: e ka fajin sistemi, truri, domethënë…, truri elektronik i ISSH- së, siç thotë banka. Duke ikur nga SHQUP - i, flasin me vete: "Mor po, e morëm vesh që opozita ka vdekur. Po këta të qeverisë, a e kanë dorëzuar atë "Deklaratën e gjallesës" apo jo? Se mos kanë vdekur gjë edhe ata, e ne presim kot të marrim pensionet prej tyre.

Ishalla, Banka nuk u dërgon atyre prapë ndonjë SMS tjetër ( dashurie, natyrisht), që t'i njoftojë për shtyrjen prapë të datës së marrjes së pensioneve, siç ndodhi për datën 20 ( të cilit muaj, të cilit vit?). Njoftimi i parë i Bankës për shtyrjen e pensioneve suplementare u vajti atyre katër ditë pas datës së caktuar të pensioneve. Mos do ketë prapë po atë mesazh edhe për pensionet e zakonshme, pas katër ditësh Banka? Të presim. Rendësi ka debati për Saimirin në Parlament.

Ka katërmbëdhjetë ditë që pensionistët nuk po marrin dot pensionet e tyre. Ata shkojnë te bankomatet e bankës, por atje nuk ka para për ta. Fillimisht, kjo ndodhi me pensionet suplementare, që historikisht shpërndaheshin më datën dhjetë të çdo muaji