Ahmetaj te biznesi fason: Përfitim nga politikat fiskale
“Synimi i paketës, kalimi në cikël të mbyllur prodhimi”
Përjashtimi nga TVSH- ja i makinerive dhe pajisjeve, si edhe disa lehtësi të tjera, qoftë në nivelin e taksimit apo mbështetjes në punësim, janë reflektuar në ecurinë e biznesit fason.
Disa prej tyre kanë arritur që të kalojnë në cikël të mbyllur prodhimi, çka ishte, sipas ministrit të Financave Arben Ahmetaj, edhe synimi kryesor i paketës mbështetëse të miratuar për këtë sektor në 3 vite më parë. "Gjithë logjika e paketës së fasonëve ishte mbështetja e këtij segmenti të industrisë së tekstileve, për të kaluar në cikël të plotë, që e gjithë vlera e shtuar krijohet dhe mbetet këtu dhe produkti i gjithë eksportohet, duke sjellë të mira materiale, monetare për kompaninë, por sigurisht edhe për vendin", tha ministri gjatë vizitës që kreu dje në një fabrikë prodhimi në Vorë. Në formë inkurajimi edhe për sipërmarrje të tjera, Ahmetaj solli në vëmendje edhe disa tregues të ndërmarrjes, e cila dikur operonte në regjimin e përpunimit aktiv ( fason), ndërsa tani ka krijuar biznesin e ri me cikël të mbyllur prodhimi, duke materializuar produktin final dhe njëkohësisht duke ofruar një mundësi të re punësimi për rreth 400 punonjës të zonës. "Sot, unë shoh të punësuar rishtazi nga zona, ku përveç se janë trajnuar, kanë mundësi të ndihmojnë edhe ata që do të vijnë gjatë vitit 2018, gati 400 punëtorë, dhe më besoni, që këtu ka familje që përfitojnë muaj pas muaji, vit pas viti nga zhvillimi i kësaj sipërmarrjeje. Jam gjithashtu shumë i kënaqur se kompania ka përfituar nga politikat, qoftë fiskale, qoftë të punësimit që ne kemi avancuar". Lehtësirat e ofruara në këtë sektor kanë sjellë, para së gjithash, edhe eliminim të burokracive. Një fakt i tillë u vu në dukje edhe nga ministri i Financave. "Një nga pronarët më thotë që, para dhjetë ditësh ka marre rimbursimin e TVSH- së, pa i telefonuar, pa i kërkuar, pa i thënë askujt. Për këtë jam shumë i lumtur dhe dua të them që, atë farë që kemi mbjellë disa vite më parë, shohim të mbijë në favor të sipërmarrjes, në favor të të gjithë atyre që punësohen, në favor të ekonomisë shqiptare".